Shillong, Naitung 22
Ki kam tuh kam thiem ki la nang bteng na kawei ka sngi sha kawei pat. Dang ha kine ki sngi, la sakhi biang ïa ka jingshah tuh jong ki kali ar shaka na kylleng ki bynta jong ka nongbah Shillong bad ruh na kiwei ki district jong ka jylla.
Katkum ka khubor ba la ïoh na ka website ki pulit, la ong ba u Daniel Surong Jyrwa, uba dei u trai jong ka Computer Store ha GS Road, Shillong u la ai ka jingujor sha ki pulit ba ha ka 18 tarik mynta u bnai, ha ka por kumba 7.07 janmiet, uwei u runar bym lah ban ithuh, u la tuh ïa kawei ka Laptop na ka dukan ka jong u.
Ha kawei pat ka khubor shah tuh, u Bah Benny Fred Mylliemngap u la ai ka jingujor sha ki pulit ba ha ka 19 tarik mynta u bnai ha ka por kumba 8 baje mynstep, u la lap ba ki runar bym lah ban ithuh ki la tuh ïa ka ar shaka ka jong u, kaba don ïa u registration number ML05-N-8849 na ka jaka sah jong u, kaba don ha Lai Mer, Umlyngka, Upper Shillong.
Kumjuh, na ka liang jong u Dashanskhem Nongkynrih u la ai ka jingujor sha ki pulit ba ha ka 20 tarik mynta u bnai, ki runar bym lah ban ithuh ki la tuh ïa ka ar shaka ka jong u, kaba don ïa u registration number ML05-X-5309 na ka jaka sah jong u, kaba don ha shnong Mawlai Umjaiur, Block-II, Shillong.
Ha kawei pat ka khubor, ka samla Darisha Syiemïong ka la ai ka jingujor sha ki pulit ba ha ka 20 tarik mynta u bnai, ki runar bym lah ban ithuh ki la tuh ïa ka ar shaka jong ka, kaba don ïa u registration number ML10-C-6448 na ka jaka sah jong ka, kaba don ha Mawlai Umjapung Tariang, Block-B, Shillong.
Kumjuh, na ka liang jong u Bah Rishanlang Marak u la ai ka jingujor sha ki pulit ba ha ka 19 tarik mynta u bnai, ki runar ki bym lah ban ithuh ki la tuh ïa ka ar shaka jong u, kaba don ïa u registration number ML05-V-8574 na ka jaka sah jong u, kaba don ha Pynthorumkhrah Block-II, Shillong.
