Shillong, Naitung 22
Ka Laitlulong ka la ïoh rung sha ka quarter final ha ka U-20 Fourth Division ba la pynïaid da ka Shillong Sports Association (SSA) hadien ba ka jingïakhun jong ka Pool 1 wat ba ar pyrshah ïa ka Laitumkhrah ka la kut noh ha ka jingïakhaid mar 1-1 kol ha ka Sngi Ba-ar ha SSA Stadium, Polo.
Katba ha ka jingïakhun jong ka Pool 2, ka la Mawlynrei ka la ïoh ban bat ïa ka kyrdan ba ha khlieh da kaba pynliem noh ïa ka Lapalang da 1-0 kol.
Hadien ba la shah khate poiñ bad 3-0 kol ha ka jingïakhun ba la lah pyrshah ïa ka Golflink na ka daw ba ka pynïalehkai da ki rangïalehkai bym dei, ka Laitumkhrah ka la donkam ban jop lai kol pyrshah ïa ka Laitlulong khnang ban ïoh rung sha ka quarter-final.
Pynban ka Laitumkhrah ka la duh jingkyrmen na ka daw ba kam shym la lah ban jop ïa ka liang pyrshah. U Bankerlang Khardewsaw u la pynkhihjar na ka bynta ka Laitlulong ha ka minit kaba 74, hynrei ka Laitumkhrah ka la lah ban pynphai kylla lyngba u Hamlet Thabah (78?) na ka bynta ban ïakhaid mar shi kol. Kumta ka Laitlulong (4 poiñ) bad ka Golflink (3 poiñ) ki la rung sha ka quarter final bad ka Laitumkhrah (1 poiñ) ka la kut noh ka jingïaid lynti ka jong ha kane ka lympung.
Ha kawei pat ka jingïakhun jong ka Pool 2, ka Lapalang bad ka Mawlynrei ki la ïoh rung lypa sha ka quarter-final hadien ba baroh ar ki la lah ban pynliem ïa ka Them Rangshken. Hynrei ka dang don ka jingeh ban rai mano napdeng kine ar tylli ki kynhun ban ïaid lyngba kum ki nongjop jong ka pool. Te kumta ha kane ka jingïalehkai ka Mawlynrei ka la lah ban pynliem noh ïa ka Lapalang lyngba ka shi kol ba la thep da u Andrew Marboh (80’+2).
Lyngba kane ka jingjop ka Mawlynrei ka la pynkut da kaba ïoh 6 poiñ, katba ka Lapalang ka la ïoh 3 poiñ bad ka Them Rangshken ka la wan sha trai khlem da ïoh jingjop.
Ka jingïalehkai jong ka Pool 3 ha ka Sngi Balang kan long hapdeng ka Lummawbah pyrshah ïa ka Mawñianglah ha ka por 4 baje nohphai sngi.
