Los Angeles, Naitung:
Ka Pentagon ha ka Sngi Nyngkong ka la bthah ia baroh ki shipai ngam um ban mih noh na Los Angeles, hadien kumba shi bnai ba u President Donald Trump u la phah ia ki sha katei ka nongbah namar ki kynrum-kynram kiba mih ha kine ki khyndiat por ba la leit.
Ha ka 9 tarik u Jylliew, la phah ia ki 700 ngut shipai ngam um ha ka sngi kaba saw jong ka jingiakhih paidbah ha LA, haba iadei bad ka jingpynmih jong u Trump ia ka aiñ ban pynher krad ia ki phetwir bad ki nongbuhai shnong kiba wan poi sha US na kiwei pat ki ri marjan. Nalor jong kine, la phah ruh ia palat 4000 ngut ki shipai ka National Guard sha katei ka nongbah Los Angeles.
Ka jingdon jong ki ha katei ka nongbah ka la long tang ha ki ar tylli ki jaka kiba don ki iing jong ka sorkar pdeng ha Los Angeles, kynthup ia ka ophis jong ka U.S. Ha ka por ba ki don shabar jong kawei ka jaka sah jong ka sorkar pdeng ha ka thaiñ Sepngi jong ka nongbah LA, ki shipai duriaw ki la kem shipor ïa uwei u briew uba la ong ba u dang mareh stet ban leit sha ka jingïakynduh jong ki shipai rangbah.
Katei ka rai ban weng noh ia ki shipai ngam um ‘Marines’, ka long hadien ba shiteng na ki shipai National Guard, ki la shah hukum ban mih noh na katei ka nongbah ha ka taiew ba la dep. Katba, kiwei pat ki dang sah hi ha katei ka nongbah kumba la phah naduh kaba sdang jong katei ka jingiakhih paidbah.
