Gaza City, Naitung:
U heh jong ka hospital ba heh duh na Gaza, ha ka Sngi Ba-ar u la iathuh ba 21 ngut ki khynnah ki la duh ei ia ka jingim tang namar ka jingbym biang ka bam bad ka jingkyrduh bam ha nongbah Gaza hapoh jong kine lai sngi ba la dep katba ka Israel ka dang bteng ban leit thombor khlem sangeh sha ki bynta bapher bapher jong katei ka nongbah.
Ka jingbun briew jong ka Gaza kaba palat ar million ka ïakynduh ïa ka jingkyrduh kaba jur bha ha ka liang ka bam bad kiwei kiwei ki jingdonkam ba kongsan, ha kaba ki nongshong shnong ki ju shah pynïap katba ki dang pyrshang ban leit wad ïa ki lad jingïarap ha ki katto katne ki jaka sam bam bad jaka sam jingïarap.
U Abu Salmiya u la ong ba ki la kharoi sa ki jait jingpang thymmai tang namar ka jingbym biang ka bam bad ka jingkyrduh bam ka la wan hap sa ha ki hospital kiba dang treikam jong ka Gaza bad kumta ruh la maham ba ka jingdon kiba iap thngan kan nang jur shuh-shuh ha kine ki sngi ban wan.
U Secretary-General jong ka UN, u Antonio Guterres, u la ong ba ka Gaza ka la shah thombor dusmon haduh katta katta bad ka jingiap jong ki briew ka la long kaba shyrkhei haduh katta katta hynrei ka Israel kam don jingsngew eiei halor kane ka jingduh noh ia ki mynsiem briew ba lui-lui bad ba kordor.
Hadien ka jingiakren ban pynjlan ia ka jingsangeh thma kaba hynriew taiew ka la pulom noh, ka Israel ka la pynjari ia ka jingkhang khyrdep kaba pura ia ka Gaza ha ka 2 tarik u Lber mynta u snem, da kaba ym shah ban rung ei ei haduh ba la shah biang ia ki trok ban rung ha ka por kaba khyndiat ha kaba kut jong u Jymmang.
Hynrei ki jingdonkam bad ki bam- ki dih ba la ioh ban lum lypa ha ka por ba sangeh thma ki la nang duna suki- suki, kaba la pynlong ïa ki nongshong shnong jong katei ka nongbah ban mad ïa ka jingkyrduh kaba jur tam naduh ba la sdang ka thma ha u bnai Risaw jong u snem 2023.
Kumta ruh la ong ba ki jingshah thombor ki paidbah ki la nang jur ha ki jaka sam jingiarap ha ki ba bun ki bynta jong ka Gaza kiba la kyrshan da ka US.
Ka UN ha ka Sngi Ba-ar ka la ong ba ki shipai Israel ki la pyniap ia palat 1000 ngut ki nong Palestine kiba pyrshang ban leit wad bam naduh ba ka GHF ka la sdang ia ka jingtreikam jongka ha kaba kut jong u bnai Jymmang, ha kaba kiba bun ki don hajan ki jaka jong katei ka foundation.
U nongaiktien jong ki shipai Israel, u Nadav Shoshani, u la pynmih ia ka video ha ka internet ha ka janmiet jong ka Sngi Ba-ar, ha kaba la iohi ia ki 950 tylli ki trok ki jingiarap kiba dang ap mynta ha Gaza, naka bynta ban pynpoi sha ki paidbah nongshong shnong ka Gaza.
Ka tnat kam bar ri jong ka US, ka la ong ba u nongmihkhmat jong u President Donald Trump, u Steve Witkoff, u leit sha Middle East, naka bynta ka jingiakren, kaba thmu ban pynkut noh ia ka jingplie lad ban ioh pyniaid ia kitei ki jingiarap sha Gaza, hynrei ym sym la ioh jingtip shai eiei shuh shaphang kane.
