Shillong, Naitung 23
Ka Nongumlong SC ka la wanphai da ka jingjop ha ka lympung ïalehkai SRGT 3rd Division Football League 2025 ba la pynïaid da ka Shillong Sports Association (SSA) hadien ba la pynliem noh ïa ka Pomlakrai SC da 2-0 kol ha ka Sngi Balang.
Ha ka jingïakhun jong ka Group-A kaba la long ha SSA Stadium Polo, ka Nongumlong ka la ïakhun tyngeh naduh kaba sdang ha kaba ka la ïoh ban thep kol lyngba u Wallam Lyngdoh ha ka minit kaba 20 bad kawei pat lyngba u Marques Myrthong ha ka minit ba 67 na ka bynta ban ïoh 3 point.
Haba phai sha kawei pat ka jingïakhun kaba la long kham shwa hapdeng ka Lawmali Pyllun bad ka Madanryting FC ki la ïasam mar shi point hadien ba ki la ïakhaid mar 1-1 kol. Na ka Madanryting la thep da u Banlailang Thabah (55), hynrei shwa ban wai ka Lawmali ka la pynphai kylla lyngba u Lanam-bhah Manner (90).
Ka jingïalehkai ha ka Sngi Palei kan long hapdeng ka Gorkha pyrshah ïa ka Kharang SC ha ka por 10:30 mynstep, katba ka Rynjah SC ïa ka Umlyngka SC ha ka por 1:30 mynsngi.
