Shillong, Naitung 23
Ka kynhun ïalehkai ka Jylla ka la mad biang ïa ka jingshah rem ba ar ha ka lympung ïalehkai Junior Boys National Football Championship 2025 (Tier 1) na ka bynta ka Dr. B.C. Roy Trophy 2025-26, hadien ba ka la mad ïa ka jingshah rem sa ha ka lahduh mynshem snem ka West Bengal da 4-2 kol ha ka Sngi Balang ha Amritsar.
U Rajdeep Paul u la ïoh hat-trick na ka bynta ban pynlong ïa ka West Bengal ban bat ïa ka kyrdan ba ha kliar na ka Group-B ryngkat 6 point na ki arsien ïakhun.
U Coach Seibor Sana u la kylliang noh da ar ngut kiwei ki rangïalehkai naduh kaba sdang, ha kaba u la wanrah ïa u Alvin Kharbani ha ka bynta shakhmat ha ka jaka u Thrisilbirth A. Sangma bad u Skhemlang Marthong ha ka jaka u Shanborlang Khongjee.
Ha kane ka jingïakhun baroh ki kynhun ki la pyrshang ban ïakhun tyngeh naduh kaba sdang. Hapoh shiteng kynta ka Meghalaya ka la ïoh ban thep ar kol lyngba u Chanjib Chetry ha ka minit kaba 13 & 38. Hynrei shwa ban kut ka jingïalehkai jong ka kylla step, ka West Bengal ka la pynphai kylla shi kol lyngba u Rajdeep Paul ha ka minit kaba 44.
Hadien katto-katne por ba la bteng ïa ka jingïakhun jon ka kylla miet ka West Bengal ka la thep biang ïa ka kol ba ar lyngba u Sagen Hansda (77). U Rajdeep u la pynbud biang ïa ka kol ba ar ha ka minit kaba 78. Ha shwa ban wai u Rajdeep (90+4) u la thep biang sa shi kol na ka bynta ban ïoh syndon ïa ka hat-trick bad ban pynlong ïa ka West Bengal ban ïoh ïa ka jingjop.
Lah ban pynkynmaw ba ha ka jingïakhun kaba nyngkong jong kane ka lympung, ka Meghalaya ka la shah rem da 5-1 kol ha ka Kerala. Watla ka jingïaid lynti ka Meghalaya ka la poi sha kaba kut, hynrei ka donkam pat ban dang ïai pynskhem ïa lade ha kane ka lympung (Tier 1) da kaba kan hap ban ïakhun tyngeh ha ka jingïalehkai kaba khatduh pyrshah ïa ka Tamil Nadu ha ka 25 tarik. Ka Tamil Nadu ka la ïakhaid khlem don ba lah ban thep kol pyrshah ïa ka Kerala mynta ka sngi.
Te kumta ka West Bengal (6 point) ka dang lamkhmat ha kane ka group bud pat sa ka Kerala (4 point), Tamil Nadu (1 point) bad ka Meghalaya (0).
