Shillong, Naitung 23
Ka Sorkar Jylla ka la pynmih ïa ka jingbthah sha baroh ki Deputy Commissioner ban long kiba peitngor bad ban shim ïa ki lad ki lynti kiba donkam ban khang lad ïoh don ka jingwan rung kyrthep jong ki briew kiba la shah pynkynriah na Assam.
Kane ka sienjam ka la wan kum ka jubab haba ïadei bad ka jingkyndang kaba dang ïaid shakhmat ha Assam pyrshah ïa ki briew kiba wan rung be-aiñ – kaba lah ban ktah pat ïa ka Jylla namar kane ka daw.
Ka hukum ba la pynmih da u Additional Chief Secretary ka tnad kam pohïing (Political), u Shakil P. Ahammed ha ka Sngi Balang ka la ong, “Ha kaba ïadei bad ka jingkyndang kaba dang ïaid shakhmat pyrshah ïa ki nongwan buhai shnong be-aiñ, ba la leh da ka Sorkar Assam bad ban khang lad ïoh don ka jingwan rung kyrthep jong ki briew kiba la shah kyndang sha kane ka Jylla kum ka jingmih na kane, la bthah ïa baroh ki Deputy Commissioner ban peitngor bad shim ïa ki lad ki lynti kiba donkam ban pyntikna ïa ka jingpeit bniah ïoh don ka jingwan rung kyrthep bad ban pynneh-pynsah ïa ka shongsuk shongsaiñ.”
Ka Sorkar Assam ka la ïaid shakhmat bad ka jingkyndang pyrshah ïa ki briew kiba wan rung be-aiñ, bad kane ka lah ban wanrah ïa ka jingpynkynriah ïa ki briew kiba lah pat ban rung sha Meghalaya.
