Shillong, Naitung 23
Ki nongkyrshan jong ka Crystal Palace, ki la pynlong jingïakhih shabar jong ka shlem treikam ka UEFA kaba ha Nyon, Switzerland, halor ka jingshah kyntait jong katei ka klob na ka Europa League.
Watla ka la ïoh ïa ka jaka sha katei ka jingïakhun lyngba ka jingjop ha ka FA Cup ha ka samoi ba la dep, hynrei ka Palace ka la shah weng noh ha ka UEFA namar ba ka la pynkheiñ ïa ki kyndon kiba ïadei bad ka jinglong trai ïa ki klob. Halor kane ka rai, na ka liang ka klob ka la ujor sha ka Court of Arbitration for Sport (CAS), bad la khmih lynti ban shim jingbishar ha ka 11 tarik u Nailar.
Lada kane ka rai kan neh, la khmih lynti ba ka Nottingham Forest kan shim ïa ka kyrdan jong ka Palace ha ka Europa League, ha kaba ka Palace kan hiar sha ka Europa Conference League.
Da kaba kyntait ban sngap jar, ki nongkyrshan jong ka Palace, bad khamtam ki nongkyrshan radbah ka Palace ne ‘Holmesdale Fanatics’, ki la pynlong ïa ka jingïakhih kum ka dak da kaba wanrah ïa ka synduk kaba la pyndap da ki pisa thok sha ki shlem treikam jong ka UEFA. Ka jingleh ka long ban pynpaw ïa kaei kaba ki ïohi kum ka jingsngewtynnad jong ka UEFA ïa ki jingmyntoi lyngba ki song pisa ban ïa ka jinglong hok.
Ha ryngkat bad katei ka synduk, la pynpoi da ka kti ïa ka shithi kaba la thoh sha u President ka UEFA, u Aleksander Ceferin. Ka la dawa na ka kynhun synshar ban pynphai biang ïa ka rai jong ka bad ban pynrung biang ïa ka Palace ha ka Europa League.
Ha ka jingbuh ka ‘Holmesdale Fanatics’ ha rynsan jong ka X, ka pynpaw ïa ka jingsngew jong ki nongkyrshan bad ka jingkyrpad kaba kyrkieh ban ailad biang ïa kane ka klob.
Ka bynta kaba la thoh ka long, “Hadien kane, ngi la leit sha ka shlem treikam jong ka CAS ha Lausanne ban pynkynmaw ïa katei ka synjuk jong ki ba ïa kane ka rai lah bad dei ban pynkylla. Ki jingïakhih pyrshah ïa kito kiba donkti kin dangïai bteng da kaba ong, “Pynrung biang mynta ïa ka Palace.”
Kane ka jingeh ka mih na u nongkhaïi na America u John Textor uba bat ïa ka bhah trai ha baroh ar tylli ki klob ka Crystal Palace bad ka Lyon kaba na France, kaba dei ka jinglong jingman kaba ki kyndon jong ka UEFA ki khang lada baroh ar tylli ki klob ki ïoh rung ha kajuh ka jingïakob.
Ka jingpyrshah jong ki nongkyrshan ka pynpaw ïa ka jingsngewsih kaba nangjur halor kaei kaba ki ïohi kum ka jingpynshitom bym hok, bad ka khubor jong ki ka long kaba shai bha: ki ngeit ba ka Crystal Palace ka dei hok ban ïoh ïa ka jaka ha ka Europa League.
