Shillong, Naitung 23
Ki jaidbynriew ritpaid kiba don haduh sanphew tylli ki jaidbynriew bapher-bapher kynthup ïa ka jaidbynriew Khasi ki la dawa na ki seng saiñpyrthei ba kin ithuh noh ïa ki ha ka riti synshar ka Bangladesh lada ki wan ha ka bor ynda la pynlong ïa ka ilekshon.
Ki jaidbynriew ritpaid ha Bangladesh ki don palat laiphew lak ngut kynthup ïa ki Khasi namar ka jingbym don ha ka riti synshar ki ju shah thombor man ka por ha katei ka ri.
Haba ki paidbah ka ri Bangladesh hapoh ka jingïalam ka BNP ki la dawa ban pynlong noh ïa ka ilekshon bathymmai na kane ka Sorkar shipor, ka la don kawei ka seng saiñpyrthei kaba dang shu mih thymmai kaba kyrteng National Citizen Party ka la leit ban pan jingkyrshan na ki jaidbynriew ritpaid lada jia ba pynlong ilekshon ha kano-kano ka por.
Haba ïoh ban ïakren bad u Organising Secretary ka Bangladesh Indigenous People Forum, Bah Andrew Sohlamar, u la ïathuh ba ka jingïakhih ha Bangladesh ban dawa pynlong ïa ka ilekshon ka dang ïaid.
U la ïathuh hadien ba ka Awami League ka seng jong ka Sheik Hasina ka la shah pynduh pyndam noh, ka la mih sa kawei pat ka seng saiñpyrthei ha Bangladesh ka National Citizen Party.
U la pyntip ba kane ka seng thymmai ka la wan pan jingkyrshan na ki jaidbynriew ritpaid ba lada ki wan ha bor kin ïoh ïa la ka jingithuh.
U Bah Andrew u la ong ba ki ritpaid ha Bangladesh kim shaniah shuh ïa kino-kino ki seng saiñpyrthei namar ki bun kiba thok namar ynda ki la jop kim ju pyntreikam hynrei ki thombor ïa ki.
U la ong ba lada ka Sorkar Bangladesh ka la ithuh ïa ki jaidbynriew ritpaid kin imsuk, kin lait na ka jingshah thombor bad kin ïoh shibun ki jingmyntoi.
Halor ka jingbteng ka jingïakhih ha Bangladesh, u la ong ba ka ïoh ka kot ha kane ka ri ka la nang hiar bad ym tip shuh aïu kan jia lada dang bteng ka jingïakhih.
