Shillong, Naitung 23
Ka jingpynslem jong ka Directorate of Education Research & Training, Sorkar Jylla ban sam ïa ki syrnot sha ki nonghikai kiba la pyndep ïa ka Meghalaya Teacher Eligibility Test (MTET) 2025 Paper-1 jong ki Lower Primary ka la pynduhnong ïa ki nonghikai kiba thmu ban thep ïa ki kam kiba la lait ha ki skul bapher-bapher.
Ki katto-katne ngut ki nonghikai kiba la pyntip sha u nonglum khubor, ki la ïathuh ba ka DERT ka la pynlong ïa ka eksam ha ka 25 tarik Ïaïong, 2025 bad la pynmih ïa ka risol ha ka 16 tarik Jylliew, 2025 hynrei haduh mynta ba la jan kut u bnai Naitung 2025 kim pat ïoh ïa ka syrnot.
Ki la pynpaw ba lada ka Sorkar ka pynslem ban ai ïa ka syrnot kan buh jingeh ïa ki namar kim ïoh lad ban thep ha ki kam ba la lait thylli. Kumta ki la kyrpad ïa ka Sorkar ba kan pynsted ban ai noh ïa ki syrnot khnang ba ki lah ban ïoh thep kam.
Katkum ka risol ba la pynmih da ka DERT, ki don haduh 8,581 ngut kiba la pass napdeng 13,940 ngut kiba la ïakhun ïa ka eksam ha 15 tylli ki centre.
Kiba pass ha kine 15 tylli ki centre ki long ha Amlarem 159 ngut, Ampati-290, Baghmara-624 ngut, Dadenggre-399, Jowai-671, Khliehriat-360, Mairang-376, Mawkyrwat-605, Nongpoh-770, Nongstoiñ-648, Sohra-299, Shillong-1599, Resubelpara-573, Tura-690 bad Williamnagar-518 ngut.
Kumjuh, na ka liang ka DERT ka la pyntip sha baroh kiba la pass ba kin phah ïa ki kot ki sla jong ki hapoh 15 sngi naduh ba la pynmih ïa ka risol sha kiba peit jong ki centre, Principal DIET khnang ban pynshisha.
