Shillong, Naitung 23
Kiba shongdie madan ha ka sngi Balang ka 23 tarik u Naitung 2025 ki la hun ïa ka jaka ba la pynbeit ka sorkar ban kynriah sha parking lot MUDA.
Ki ba shongdie madan kiba don ha ka shatri jong ka Meghalaya Greater Shillong Progressive Hawkers And Street Vendors Association (MGSPHSVA) hapoh ka jingïalam ka Kong Biolin kum ka president ryngkat ka Kong Angela ka ba dei ka nongaibuit ha kaba nyngkong ki la khluit bad bitar ïa ka jingleh ka Shillong Municipal Board (SMB) da kaba shu pynkhalai nusib lyngba ka jingjied ïa ki ‘slip’ ban ïoh ïa u nombor khnang ba kin shong die jingdie ha Parking Lot MUDA.
Haba pynpaw ïa ka jingbitar ki nongshong die madan kiba ju shong ha Khyndai Lad ki la ong, ba kim dei ki nongkhalai ba hap ban shu pynkhalai ïa ki dukan ba kin ïoh shong ha katei ka jaka.
Ka jingpynlong ka Shillong Municipal Board (SMB) ban shu pynkhalai ïa ki nombor ka long kum shibynta ba kan ym don kano-kano ka jingïaknieh ïa ki jaka shong bad kat kiba ïoh ïa ki nombor ba ki la jied kin hap beit ban shong ha kato ka jaka ba la dep shna kyrpang da ka sorkar.
Ka Kong Biolin Pyrtuh ryngkat bad ka kynhun jongka kiba don ha ka shatri jong ka Meghalaya Greater Shillong Progressive Hawkers And Street Vendors Association (MGSPHSVA) tang hadien kumba katto-katne por eiei ba ki la pynpaw ïa ka jingpyrshah jur ban pynkhalai nusib da ka Shillong Municipal Board (SMB) ban ïoh ïa ki nombor ban ïoh shong dukan ha jaka ïeng kali MUDA, ki la wan shakhmat ban pyndem ïalade da kaba wan jied noh ïa u nombor ban ïoh shong dukan ha MUDA.
Ha ka jingjied ïa u nombor ha ka janmiet Sngi Balang, ka Kong Biolin Pyrtuh ryngkat bad ka kynhun ba ïadonlang ha kajuh ka seng ki la ïoh ïa u nombor la kijong kijong ban ïoh shong ha katei ka jaka.
“Nyngkong ka Kong Biolin Pyrtuh ryngkat bad ka kynhun jong ka ki la wan ban pynpaw ïa ka jingpyrshah jur halor ka jingpynkhalai nusib ka Shillong Municipal Board (SMB) na ka bynta kiba shong die madan, hynrei ha kaba khatduh ki la wan ban pyndem da kaba wan hakhmat jong ki ophisar ka SMB ban jied ïa ki slip ban ïoh ïa u nombor ban ïoh shong dukan ha katei ka jaka ba la pynshna ka sorkar.”
Ka jingpynkhalai nusib ka SMB ïa ki nombor na bynta kiba shong die madan ka la kut noh ha ka por janmiet bad baroh ki la ïoh la ki jong ki jong ki jaka ba dei ban shong ha jaka ïeng kali MUDA ba la pynshna kyrpang da ka Sorkar.
Haba pyrshang pat ban ïakren bad ka Kong Biolin Pyrtuh hadien ba ka la dep ban shim ïa u nombor pynkhalai nusib ban ïoh shong dukan ha katei ka jaka, ka la kyntait mardor ban kren sha ki lad pathai khubor.
Kaba la pynlong ïa ki nongthoh khubor ban pyrshang ban ïakren bad ka Kong Biolin Pyrtuh ka dei namar ha kaba nyngkong shwa ban sdang ka jingkhalai nusib ka la wan ban pyrshah ïa ki briew ka Shillong Municipal Board (SMB), hynrei ha kaba khatduh pat ka la pynkohnguh noh ïalade bad wan hakhmat ki briew ka SMB na bynta ban shim kawei ka slip ban ïoh ïa u nombor khnang ban shong dukan ha katei ka jaka.
Ka Kong Biolin Pyrtuh ka la ïaleh beit ban kiar na ki nongthoh khubor bad kam shym la kwah ban kren eiei halor katei ka jingleit shim bynta jong ka ban jied ïa ki slip.
