Khliehriat, Naitung 23
Ka Lakadong Umlatdoh, Moolamanoh bad Ryntihlang Brishyrnot ki la ïoh jingjop ha ka lympung ïalehkai 2nd Division Football League ba la pynïaid da ka East Jaiñtia Hills District Football Association ha ka Sngi Balang.
Ha ka jingïalehkai kaba la long ha madan artificial turf Diengshynrum kaba ha Khliehriat, ka Lakadong Umlatdoh SSC ka la pynliem noh ïa ka Tpep Swer da 2-0 kol bad ïa kine kol la thep da u Emonmi Amkhloo (48 & 80).
Ha ka jingïalehkai kaba bud ka Moolamanoh SC ka la jop da 2-1 kol ïa ka Ratachera CSC. Ïa ki kol jong ka Moolamanoh la thep da u Kenny sixtus Dkhar (44) bad u Jesper Dkhar (75). Katba na ka Ratachera la thep da u Aibanshkem Surong (39).
Haba phai sha kawei pat ka jingïalehkai ka Ryntihlang Brichyrnot ka la pynliem noh ïa ka Khliehmyntriang SCSC da 2-1. Ïa kine kol la thep da u Aloius Churmang (7 & 34), katba na ka Khliehmyntriang la ïarap pynthep da u rangïalehkai ka liang pyrshah u Precious Sutnga (66) shwa ba kan shah rem.
