Shillong, Naitung 23
Ki ophisar ka State Pollution Control Board (SPCB) ryngkat ki nongïalam shnong na Phudmuri bad Mawdatbaki ha ka 23 tarik u Naitung 2025 ki la leit ban jurip ïa ki dukan ha ka thaiñ Mawlai Stand Bus.
Kane ka jingjurip ïa ki dukan ka dei halor ban kyrpad ïa kiba shong dukan baroh ha katei ka thaiñ ba kin sngewbha ban ym pyndonkam shuh ïa ki plastik barim, hynrei ban pyndonkam noh da ki plastik ba la ai jingbit da ka FSSAI, da kaba bthah ba ïa ki plastik barim ki dei ban pynphai noh sha ki dorbar shnong.
Ki ophisar ka SPCB ki la sdang ban jurip naduh Mawlai Stand Bus ter-ter ïa ki dukan die doh, ki dukan die jhur bad kiwei-kiwei de.
Kane ka sngi ka dei ka sngi kaba nyngkong ba ki la sdang ban jurip ïa ki dukan ban bthah ba kim dei shuh ban pyndonkam ïa ki plastik kiba ju pyndonkam barabor, da kaba bthah ruh ba kin pyndonkam noh ïa ki plastik ba la dep shna kyrpang.
Haba ïakren bad u Bah Churchill Syiemlieh, Rangbah Dong Mawlai Phudmuri hadien ba la dep ban leit jurip ïa ki dukan, u la pynpaw ka jingsngewïahap halor ka jingbthah ka SPCB ban ym pyndonkam shuh ïa ki plastik barim ha ki dukan, hynrei dei ban pyndonkam noh da ki plastik ba la shna kyrpang. U la kyrpad ruh ïa ki paidbah ba kin bud ryntih ïa kane ka jingbthah ka SPCB.
Shuh-shuh u la ong, baroh ki dukan kin sngewbha ban pynphai noh ïa ki plastik ba ju pyndonkam barabor sha ka dorbar shnong.
“Ka jingwan ka State Pollution Control Board (SPCB) ka long kum shibynta ban ai jinghikai ïa ki paidbah ban kiar pyndonkam ïa ki plastik barim, namar ka dei ka plastik kaba ktah ïa ka mariang,” la ong u Bah Churchill.
