Jowai, Naitung 23
Ki nongshong shnong ka Lapangap jong ka West Jaiñtia Hills District ki la nang dukha mynsiem namar ka surok ruh kim ïoh shna bad ka rep ka riang ruh kim ïoh sdang haduh mynta, katba ki Karbi pat ki dang ïoh shna surok haduh mynta mynne.
Ka jingshna ne maramot ïa ka surok khyndew kaba 10-kilometre na Lapangap sha Khanduli la pynsangeh noh naduh ka 18 tarik mynta hi u bnai namar ka jingbthah jong ki bor pynïaid district jong ka West Jaiñtia Hills District.
Hynrei hapdeng ka jingburom ïa ka jingbthah jong ki bor pynïaid district, ki nongshong shnong ka Lapangap ki la nang kthang mynsiem ban ïohi ïa ka jingbteng ïa ka jingshna surok da ki Karbi jong ka Langkaroi.
Ka Shnong Langkaroi ka don hapdeng ka shnong Lapangap bad ka shnong Khanduli bad ki Karbi jong katei ka shnong ki kam ba ka Langkaroi ka hap hapoh West Karbi Anglong District, Assam.
Ki nongshong shnong Karbi ha ka 23 tarik mynta u bnai, ki la pynjulor ïa ka surok khyndew naduh Lapangap sha Khanduli da kaba pyndonkam ïa ki puh shilum.
Haba ïakren bad u Waheh Shnong ka Lapangap u Ma Deimonmi Lyngdoh u la ïathuh ba ki Karbi ki la mait bad pom naphang ïa ki dieng ki siej ha ki bynta jong ka surok ba dang shu dep maramot da ki nongshong shnong ka Lapangap da ka jingthmu pynjulor bad tyllep noh ïa katei ka surok khyndew kaba la rim tam.
Ha kawei pat ka liang, u Ma Deimonmi u la ïathuh ba ki nongshong shnong ka Lapangap ki shong khuslai ha la ïing ha la sem namar ka dei ka por ban sumar ïa u kba bala thung la tep hynrei haduh mynta mynne naduh ka 25 tarik Jylliew (June) kim pat ïoh lad satia ban leit sha la ki hali pynthor ba don markhap bad ka shnong Tahpat jong ki Karbi.
Shuh shuh ki nongshong shnong ka Lapangap ki ud ki nam ba ki pulit ki don hapoh shnong hynrei kim ïoh leit synran sha ki hali ki pynthor namar ba ym pat ïoh hukum na ki bor bahalor bad ki la kren bynñiaw ba myntoi aïu ban buh pulit lada ki shong tang hapoh shnong.
Halor kane ka jingmait jingpom dieng jong ki Karbi hapoh u pud u sam jong ka Lapangap, na ka liang ka Dorbar Shnong kala dep ban pyntip sha ki bor pynïaid District jong ka West Jaiñtia Hills hynrei na ka liang ka bor District kam shym la phah Magistrate bad bor pulit ban tuklar ne pynsangeh ïa ki Karbi.
