Shillong, Naitung 23
Ka Federation of Khasi, Jaiñtia & Garo People (FKJGP) ka la pynpaw ïa ka jingkhuslai ba ka jingkyndang ïa ki mynder ri dang shen na Assam ka lah ban lam sha ka jingwan rung sha Meghalaya, khamtam ba ka Jylla ka dei kaba don mar syndah bad ka Assam.
Ha ka kyrwoh khubor ba la pyllait ha ka Sngi Balang, u Vice President ka FKJGP Bah Kitboklang Nongphlang, u la pynpaw ba ki district kum ka Ri-Bhoi, West Khasi Hills, East bad West Jaiñtia Hills lem bad ka thaiñ Ri-lum Garo, ki don jingma bha namar ka jingbym don ki lad ban pyrkhing ïa ka jingwan rung kyrthep ki briew ba nabar sha Meghalaya.
Ka FKJGP ka la pynrem ruh ïa ka Sorkar Jylla ba kam lah ban pyntreikam bha ïa ki aiñ kiba la don lypa kum ka Inter-State Migrant Workmen (Regulation of Employment and Conditions of Service) Act, 1979, ka Meghalaya Residents Safety and Security Act (MRSSA) 2016, bad ka Meghalaya Identification, Registration (Safety & Security) of Migrant Workers Act 2020.
U la kynthoh ba kane ka jingbym lah pyntreikam bha ïa ki aiñ ba la don lypa ka pyni ïa ka jingbym don mon da ki bor synshar ban ïada ïa ki paid riewlum trai Jylla.
Une u Nongïalam ka FKJGP u la pynpaw ruh ïa ka jingbym sngewtynnad halor ka jingbym leh eiei ka Sorkar Jylla ban buddien bad ka Sorkar Pdeng ha ka ban pyntreikam ïa ka Inner Line Permit (ILP), watla ïa kane la mynjur da ka ïingdorbar thawaiñ naduh u snem 2019.
U la kynnoh ba ka Sorkar Jylla ka la pyrshang ban tap eit miaw ïa ka jingbym lah treikam jong ka ha ka nam da kaba tyrwa ban wanrah ïa ki jingpynkylla ha ki kyndon ki ban pynkhlaiñ ïa ka MRSSA, 2016.
U Bah Kitboklang u la ong, ka jingbym shimkhia ka Sorkar ka pynpaw shaikdar ba ka Sorkar Jylla kam don mon satia ban ïada ïa ka jaidbynriew bad ki la kheiñ dewthala ïa kata ka khet ba ki bat ïa u lakam synshar bad kata ka sur ba la mynjur ha ïingdorbar thawaiñ halor ka ILP ba ka dei tang ka jingpynthame ïa ki kynhun sengbhalang bad ïa ki paidbah nongshong shnong jong ka jylla hi baroh kawei namar katei ka jingleh drama jong ka Sorkar MDA ba la lamkhmat da ka NPP mynta la ar samoi (two terms) ka la paw pyrthei hadien jong ka jingkren jong uwei na ki Myntri Khynnah jong ka Sorkar Pdeng uba bat ïa ka tnat Cooperation u Krishan Pal Gurjar uba dang shu wan shen sha ka Jylla Meghalaya dang ha kine ki khyndiat sngi ha kaba u la pynpaw ba um don jingtip eiei ruh em ïa ka jingkwah ban pyntreikam ïa ka ILP ha ka jylla Meghalaya.
Ka FKJGP ka buh ka jingkylli, hato kita ki ‘Infiltration Check Gate’ kin shu long tang ki khyrdop lum khajna jongno-re-jongno bad kita ki ‘Labour Inspectors’ ba la thung ha manla ki Block kin shu pynsyrwa kai ïa ka pisa jong ka Sorkar da kaba shu shim tulop ei khlem da treikam satia? Ka Sorkar Jylla ka la dei ban shimkhia mardor bad kam dei satia ban dang kheiñ sting halor katei ka bynta bad lada ka Sorkar Jylla kam pyni satia kino-kino ki dak ki shin na ka liang jong ka FKJGP kan sa leh la ka jong ka bynta.
Kyntang ïawai ka FKJGP ka bthah ïa baroh ki shnat treikam jong ka seng kiba don ha ka jylla hi baroh kawei ba ki dei ban long kiba peitngor bad ban bteng biang ïa ka jingkhynra mynder khnang ba kan long ka jingïada ïa ka jaidbynriew na ka jingshah tyllep bad na ka bynta ka jingshngaiñ ki pateng ki ban sa wan.
