Shillong, Naitung 23
Ka Executive Committee jong ka Khasi Hills Autonomous District Council (KHADC) hapoh ka jingïalam jong u Chief Executive Member (CEM) Bah Shemborlang Rynjah, ha ka Sngi Balang jong ka 23 tarik u Naitung, 2025, ki la leit ban jurip ïa ka ‘Law Syiem ne ka ‘Law Mawpat hadien ba la mih ka jingkynnoh ba ka don ka jingai jaka ïa ki katto-katne ngut ki MLA.
Ïa u CEM la synran lang ruh da u Chairman jong ka Council Bah Strong Pillar Kharjana, ki Executive Members (EM) jong ka EC, ki MDC na ka Voice of the People Party (VPP) bad ki ophisar jong ka Council na ki lai tylli tnat treikam, kita na ka tnat Elaka, ka tnat Jaka Puta bad tnat Khlaw.
Haba kren sha ki nongthoh khubor, u CEM ka KHADC u la ong ba kane ka jingleit jurip jong ka Council ka dei ban wan khmih bad peit ïa ka jingkylla jong kane ka Khlaw Mawpat kaba don shibun ki dieng kseh.
U la ong hadien ba u la ïohpdiang ïa ka jingujor lyngba ka shithi na ka Youth Wing bad Women’s Wing jong ka VPP halor ka jingwan jurip jong ki ïa katei ka khlaw ha ki sngi kiba dang shen.
U la bynrap da kaba ong ba ka Executive Committee shen kan sa lum ïa ka jingïalang ba kyrpang ban ïakren halor ka jinglap jong ki ha kane ka jingleit jurip.
“Hadien ka jingwan jngoh jong ngi mynta ka sngi, ha kine ki sngi ngin sa khot kyrpang ïa ka EC jong ngi bad ha kata ka EC ba ngin sa shong, ngin pyrkhat kaei ka sienjam kaba ngin leh ha kaba ïadei bad kane ka ‘Law Adong kaba ha u snem 2014, la aiti kum ka Law Adong. Haba ngi ong ‘Law Adong kaba ngi sngewthuh shai hi na ka bynta ka jingpynneh pynsah ïa ka khlaw ka btap khamtam eh na ka jingdonkam jong ki khun ki hajar jong ka Hima”, ong u CEM.
U CEM u la ong ba ha ka jingïaid lynti naduh Shyiap Langkyrding ter-ter haduh Mawroh, la sakhi ba ki don shibun ki jingkylla hapoh kane ka khlaw bad ki mawpud kiba pynïeng hapdeng jong kane ka khlaw.
“Ngim shym tip ba ki dei ki mawpud jongno ruh bad haduh mynta hi ngi dang sah hapdeng ka umdum namar ba ngim tip. Ka jingwan jong ngi mynta hangne ka long ka sienjam kaba nyngkong bad ka sienjam kaba ar ka long ba ngin sa shong da ka EC ha kine ki khyndiat sngi bad ngin sa shim ïa kaei ka sienjam ba ngin rai na ka bynta ban pynbha ïa kane ka khlaw kaba donkam eh na ka bynta ka imlang sahlang,” bynrap u CEM.
U la buh jingkylli ruh, hato kito ki briew kiba ïoh ban pyndonkam ïa katei ka khlaw lada ka dei da ka lynti kaba dei ruh, hato ki dei hok ne em ki khun ki hajar jong katei hima?
“Kaba sheptieng ka long lada ki ïoh da kiwei pat namarba ka jingdon jong kane ka khlaw ka long na ka bynta ki khun ki hajar ba kin pyndonkam katkum ki kyndon ha ka jingïateh ha ka 22 tarik u bnai Jymmang, 2014, ba ngi la ïohi ba ki khun ki hajar ki lah ban pyndonkam ïa kane ka khlaw na ka bynta bit ka biang bad ym ban pynjulor ïa ka,” ong u CEM.
Haba kylli halor ka jingkynnoh ba ai jaka ïa ki MLA, u CEM u la ong ba lada kane ka jingkynnoh ka dei kaba shisha na ka liang ka Council kan sa shim ïa ki sienjam kiba tyngeh.
Haba kylli pat halor ki jingkynnoh ba ïa ka jingïateh kular jong u snem 2014 ym shym la mynjur satia da ka Dorbar Pyllun ka Hima Mylliem, u CEM u la kdew ba ïa kane ka jingïateh kular la soi da u Syiem ha katei ka por kata u Bah Latho Manik Syiem ba la khlad noh ha ryngkat bad ki Myntri jong u.
“Ha kato ka por ngim don bad ngim tip eiei, nga tharai haba la don ka jingïasoi hapdeng u Syiem bad Myntri, ban ong ba ka hima kam tip ïa kata te ngam tip shuh. Hynrei ïa kata ngan buh biang ïa ka jingkylli, hato la pan jingmut ne pyntip ïa ka Dorbar Pyllun ha ka por ba la weng noh ïa ka jingïateh 2014?,” u la buh jingkylli.
Haba maham ïa ka jingktah jong ka jingpynjot ïa ki khlaw ki btap na ka bynta ki pateng ban wan, u la ban jur, “Lada ngi dang ïai bteng ban pynjot ïa ki khlaw kiba ai ïa ngi ïa ka lyer kaba khuid bad ka lyer ban ring bad pynhiar mynsiem, kumno ngin pynshisha ïa ki kam jong ngi sha ki pateng ban wan?”.
Haba ïadei bad ka jingbym don lang ki nongmihkhmat na ka Hima Mylliem haba jurip ïa kane ka khlaw, u CEM u la ong ba kane ka dei tang ka jingwan jurip jong ki ïa kane ka khlaw, u la bynrap da kaba ong ba ka Hima Mylliem kan sa don lang ha kiwei ki jingïalang.
