Jowai, Naitung 23
Ki pulit ka East Jaiñtia Hills ki la ïoh ban kurup haduh 373.61 kilo u kynja bad kem noh ïa uwei u briew uba donkti ïa uba la tip kyrteng kum u Babul Medhi, 29 snem ka rta na Goalpra, Assam.
U Superintendent of Police ka EJH lyngba u kyrwoh u la pyntip ba ha ka janmiet jong ka Sngi Balang mar ïa ïoh ka jingtip kaba thikna, ka kynhun ki pulit na Umkiang Police Patrol Post ki la pynlong ka jingpynap shrip ha ki bynta jong ka Damchera hadien ba ki la ïoh ban bat noh ïa kawei ka kali Toyota Innova kaba don ïa u registration Number AS01-BV-6264.
Hadien ba la pynlong ïa ka jingtalasi ïa kane ka kali, ki pulit ki la ïoh ban kurup noh ïa bun tylli ki song ha kaba la thep bha ïa u kynja uba don ka jingkhia haduh 373.61 kilo.
Ha ka jingtohkit, ki pulit ki la shem ba une u kynja u dei uba wan na Tripura da ka jingthmu ban pynpoi sha ka nongbah Shillong.
Ki pulit ki la kem noh ïa uwei u briew uba donkti bad ka jingtohkit ka dang ïaid shakhmat khnang ban lapdien shuh shuh ïa kiwei pat kiba donkti.
