Shillong, Naitung 23
U MP ka Voice of the People Party (VPP) na Shillong Parliamentary konstitwensi, u Dr. Ricky A.J. Syngkon u la kyrpad ïa ka jingtuklar jong u Myntri ka tnad kam ïada ri ka Sorkar Pdeng, u Rajnath Singh halor ki mat kiba kynthup ïa ka jingpyntreikam ïa ka Inner Line Permit (ILP), ka jingpynrung ïa ka ktien Khasi ha ka Khyrnit kaba 8 jong ka Riti Synshar ka Ri lem bad kiwei-kiwei ki mat kiba kongsan ba ïadei bad ka Jylla bad ka Thaiñ Shatei Lam Mihngi.
Ha ka shithi sha u Singh, u Dr. Syngkon u la ban jur halor ka jingdonkam jong ka ILP ha ka Jylla ban pynbeit ïa ka jingrung jong kiba nabar bad ban ïada ïa ka jinglong tynrai ka kolshor jong ka Jylla, ka hok halor ka khyndew ka shyiap, bad ka jingshngaiñ ha ka imlang-sahlang bad ka ïoh ka kot jong ki ‘riewlum.
“Ka jingdawa kaba la slem ban pynjlan ïa ka Inner Line Permit (ILP) sha ka Jylla (Meghalaya) ka ïai bteng ban long ka mat kaba pynsngewkhia na bynta ki trai-ri trai-muluk jong ka. Ki paidbah ka Jylla ki khuslai shi kat dei namar ka jingnang kiew ha ka jingwan rung kyrthep, kynthup kito na shiliang u pud u sam bar-ri bad ka Bangladesh bad ki jingïoh jingtip halor ka jingwan shong shnong ba khlem ïoh jingbit bad ka jingskud jaka ha ki jaka ‘riewlum khamtam ha ki jaka khappud kiba don jingma bad kiwei,” u la ong.
U la ong ruh ba kane ka jingeh ha ka liang ka jingbun briew ka buh jingma kaba khraw ïa ka jinglong kyrpang ka kolshor, ka hok halor ka khyndew ka shyiap, bad ka jingshngaiñ ha ka imlang-sahlang bad ka ïoh ka kot jong ki ‘riewlum ka Jylla.
“Ka rukom treikam ka ILP, kaba la treikam lypa ha ki Jylla ba marjan kum ka Arunachal Pradesh, Mizoram, Manipur bad Nagaland, la shim ba ka dei ka rukom ïada kaba donkam katkum ka aiñ ban khanglad ïa ka jingwan rung jong kiba nabar bad ban pynneh-pynsah ïa ka jinglong ‘riewlum ba kyrpang jong ka Jylla,” u la ong.
“Namarkata, nga kyrpad jur ïa ka jingkyrshan jong phi ban rah ïa kane ka kam sha ka tnad kam pohïing ka Sorkar Pdeng bad ban sdang ïa ka rukom ïamir jingmut kaba buh ryntih bad baroh ki nongshim bynta ban bishar bniah ïa ka jingdawa ILP ha ka Jylla ha ka rukom kaba hok, kaba sngewthuh bad kaba buh por. Ka jingai ïa ka ILP kan pynurlong ïa ka jingangnud ba sahteng jong ki paidbah bad ban pynskhem biang ïa ka jingshaniah jong ki ha ki jingïada ka Riti Synshar ba la ai sha ki jaidbynriew trai-ri trai-muluk,” u la bynrap.
U MP u la kyrpad ruh ïa ka jingkyrshan jong u Myntri ban pynrung ïa ka ktien Khasi ha ka Khyrnit kaba 8 jong ka Riti Synshar ka Ri, da kaba ithuh ïa ka jingkordor jong ka kum ka dak ka riti-dustur ba riewspah jong ka Jylla.
“Ka ktien Khasi, kaba la kren da kiba bun ki nongshong shnong trai-ri trai-muluk jong ka Meghalaya, ka long ka dak kaba kongsan jong ka riewspah ka kolshor bad histori jong ka Jylla. Watla ka long kaba la pyndonkam bha, ka riti-dustur thoh kot, ka jingithuh ba pura ha ka kyrdan jong ka Jylla, bad ka jingpynurlong jong baroh ki kyndon ba donkam haba nujor bad katto-katne kiwei pat ki jait ktien kiba la shah kynthup ha ka Khyrnit ba 8, ka Khasi haduh mynta kam pat ïoh ïa ka jingithuh ha ka Riti Synshar ka Ri hapoh ka Khyrnit ba 8 jong ka Riti Synshar ka ri India,” u la ong.
Ha kajuh ka por, u la kyrpad ïa ka jingkyrshan jong u Myntri ban rah ïa kane ka jingdawa kaba la slem bah ha ka tnad kam pohïing ka Sorkar Pdeng bad ki bor ba dei khmih ban ïarap haba ïadei bad ka jingithuh da ka Riti Synshar ïa ka Khasi-ka jingangnud kaba la slem jong ki paidbah ka Jylla.
Na ka liang u Dr. Syngkon u la wad ruh ïa ki lad kiba kham bha na bynta ka ïoh kam ïoh jam ki samla trai-ri ha ki tnad ïada ri kiba don hapoh ka Jylla, khamtam ha ki kam ka thup ‘Group C’ bad ki kam ‘Support Staff’.
U MP u la kyrpad ruh ban kyntiew kyrdan ïa ka Indian Institute of Tourism and Travel Management (IITTM), Shillong Centre, sha ka shlem pule kaba pura bad ba laitluid.
Kumjuh, u la kyrpad ïa ka jingai kyrdan ‘Institute of National Importance’ (INI) sha ka North Eastern Indira Gandhi Regional Institute of Health and Medical Sciences (NEIGRIHMS), Shillong, ban kyntiew ïa ki kam pule bad ka jingshakri jong kane ka jaka.
Shuh shuh u MP u la kyrpad ban pynïoh biang bad pynkhlaiñ ïa ka jingpynïasoh liengsuiñ na Shillong Airport (Umroi) sha ki jaka ba kongsan jong ka Thaiñ Shatei Lam Mihngi, kynthup ïa ka Dimapur, Aizawl, Agartala, bad Silchar.
