Shillong, Naitung 23
Ka Deen Dayal Upadhyay Grameen Kaushalya Yojana ne DDU-GKY, kaba dei ka thup treikam halor ka jingtbit bad ka jingai kam bad kaba dei ruh ka prokram jong ka Sorkar Pdeng jong ka tnat Rural Development, ha ka 22 tarik Naitung 2025 ka la pynlong ïa ka prokram pynkup burom na ka bynta ki khynnah kiba la ïohpdiang ïa ka jingshah ai jinghikai na kane ka prokram bad kiba lah ïoh ruh ïa ka lad ïoh kam ïoh jam ha kylleng ka Ri India.
Ïa kane ka prokram la pynlong ha Mawryng-kneng Block ha ka jingïadon ryngkat lem u Bah Heavingstone Kharpran uba dei u MLA ka Mawryngkneng Konstitwensi bad uba la long ruh kum u kongsan ha katei ka sngi, u Bah Anthony Lyngdoh kum Block Development Officer (BDO), u Bah Lombok Dhar kum Chief Operating Officer (COO) ka DDU-GKY bad ki nongtrei jong kane ka tnat.
Haba ai jingkren ha kane ka sngi, na ka liang u MLA u ai khublei ïa kane ka tnat kaba la trei shitrhem ban pynlong ïa kum kine ki prokram ai jinghikai lyngba u Chief Operating Officer (COO) bad ki nongtrei ban pynurlong ïa kane ka jingthmu jong ka Sorkar Kmie kaba la long ka jingkyrkhu ïa ki samla ka thaiñ Mawryngkneng Constituency kiba lah ïoh ïa ki lad ïoh kam ïoh jam lyngba kane ka prokram.
Haduh mynta na ka Mawryngkneng C&RD Block, ki samla kiba ïoh jinghikai ki don haduh kumba 363 ngut bad kiba lah ïoh kam lyngba kane ka jingshah ai jinghikai ki long 200 ngut.
