Nongpoh, Naitung 23
Ki nongïalam bad dkhot jong ka Khasi Students’ Union (KSU) Kyrdemkulai 5KM Unit hapoh ka jingïalam jong u Vice President samla Ambyrius Kharkrang, u Sports & Cultural Secretary samla Elisha Lyngdoh Marshillong, ki la ïoh ban bat ïa kumba 7 ngut ki bar jylla kiba thmu wan bylla sngi sha katei ka thaiñ khlem don satia ïa ki kot ki sla kiba biang.
Na ka liang ka seng hadien ka jingtohkit bad shem ba kitei ki bar jylla kim lah satia ban pyni ïa ki kot ki sla, ki la beh krad noh ïa kitei bar jylla na katei ka thaiñ sha ka jaka kaba ki wan da kaba ong ruh ba ka jingwan rung bad trei beaiñ da kitei ki mynder ka la long kumba knieh ïa ka pliangja jong ki para doh para snam kiba im sngi bad pynbit pynbiang ïa ka ïing ka sem lyngba ka kam bylla sngi.
Shuh-shuh, na ka liang ki nongïalam ka seng ki la maham tyngeh ruh ïa kito kiba ju mlien ban wanrah nongtrei bar jylla sha kane ka thaiñ bad pynpaw ba ka seng hi kan ym ailad satia ïa kum kine ki jait kam kiba long beaiñ bad kan ïai long kaba peitngor na kawei ka sngi sha kawei pat khnang ba ki para doh para snam kin shong shngaiñ bad im suk im saiñ ha la ki shnong ki thaw.
