Ha kine ki sngi, ngi ïohi sa tang ki jingjia kiba sngewtriem. Ka jingshah pynïap klep, ka jingshah pynïap ha la ki samla bad kurim, ka jinglap metïap, jingïap sha ki lum ki wah, jingkhlad na ka jingngat bih ha ka bam, jingïakynad ba bun rukom khlem da ïakren shuh ïa ki kam tuh kam thiem kiba la jyllei haduh katta-katta. Kaei tharai ka daw kaba pynlong ïa ki katto-katne ki briew ba kin leh ïa kaei kaba ki la leh? Ïa kiba kum kita ki briew dei ban phah beit bniah ruh ha ki doktor sumar ïa ka jingmut jingpyrkhat bad ym tang ban shu set along ïa ki. Hap ban sngewthuh ïa ki daw watla ka aiñ kam dei ban map ïa ki nongleh ïa ki kam bymman khamtam kiba donkti ha ka jingpynïap briew ne jingleh be-ijot ïa ka longrynïeng-manrynïeng ki kynthei khynnah.
Ha kaba ïadei bad ka jingkhlad jong ki briew sha lum sha wah, ki nongshong shnong ki dei ban sngewthuh ba ha kum kine ki por lyiur, ka long kaba ma ban leit ruma khlem da tip bha ïa ka jaka. Ngim lah ban tip lypa lano u slap un ther tyngeh ha kato ka jaka kaba ngi leit. Lada ngi sniewbok, ngi shu ngat ei ha ka apot sepsngi. Kata ka jingleit khwai ha kum kane ka por sha ki wah bah ka buh jingma shibun ïa ka jingim briew. Ngim dei ban kheiñ sting ha ki por kiba kum kine. Ngi dei ban ap ynda la kham jai-jai u slap. Ha kaba ïadei bad ka jingkhlad jong ki briew ha lynti syngkieñ, ngi sngewdei ban kyntu ïa ka Sorkar bad ka tnat PWD ba kin buh bha da ki jingthoh bad ki dak ha lynti-lynti khnang ba ki nongñiah kin sngewthuh ïa ka rukom ïaid jong ki. Ha ki jaka ba long khun lane long riat, dei ban don da ki jingthoh kiba shai kiba long kum ki jingmaham ïa ki nongñiah. Nalorkata, dei ban don ki jingker mawkynroh ha ki surok kiba khim bad kiba buh jingma khnang ba kan lah ban ïada ïa ka jinghap ki kali sha riat. Ki nongñiah ruh ki dei ban long kiba adkar bad ym ban shu leh thurmur khamtam sha ki jaka ba ki dang leit thymmai namar kim pat sngewthuh ïa ka jinglong jong ka surok.
Ngi lah ban sakhi ba hadien ka jingjia shah pynïap jong u kurim ha la ka kurim ha ka thaiñ Sohra, kaba la pynkhih win ym tang ïa ka jylla hynrei ïa ka ri hi baroh kawei, la bteng sa kiwei pat ki jingjia shah pynïap bad shah rahbor, kum ka jingjia ha Nongrah, ha kaba u kurim u la pynïap ïa la ka kurim, ka jingjia ha Mairang ha kaba u samla u la pynïap ïa la ka samla. Ngi la sakhi ba ka kam pynïap ha kine ki sngi ka la sdang ban jyllei bad i kumba ka jingim kam don dor shuh hakhmat ki nongleh kam bymman. Wat haba ngi phai sha rilum Garo, la sngew shyrkhei bha kata ka rukom shah pynïap jong ka samla ha la u samla. Nangta dang shen ka jingshah rahbor jong ka heprit ba dang 6 snem ka rta bad kiwei kiwei ki jingjia shah pynïap bad shah leh be-ijot bad shah lehbeiñ.
Hynrei ka long ruh kaba pynsuhjer ban tip ba ki don ki briew ki bym salia shuh ban shim ïa ka jingim jong ki para briew. Shano kata ka jingsheptieng? Shano ka jingïatiplem? Hato ym long shuh ban ïakren ïapynbeit da ka ktien haduh ba hap ban da shim syndon ïa ka jingim? Ngim don hok ban shim ïa ka jingim jong kiwei pat namar ha kane ka pyrthei shai, ka don ka aiñ ka kanun bad ki ïingbishar. Lada don ka jingïakajia, leit tied ïa ka jingkhang jong ki bor ba pyntreikam ïa ka aiñ lane ki ïingbishar bad ym ban shim hi halade ïa ka aiñ.
