Shillong, Naitung 23
Ka Meghalaya Boxing Association (MBA) ka la pynlong ïa ka prokram jied nongïakura na ka bynta ka East Khasi Hills District ha ka 21 tarik mynta u bnai ha Indoor Sports Hall, Mawlai Mawroh, Shillong.
Ka jingthmu jong kane ka prokram ka long shi bynta ban pynkhreh ïa ka 39th National Games 2027 ha kane ka Jylla. Ha kane ka prokram la wan shim bynta da 40 ngut ki shynrang bad 20 ngut ki kynthei.
Kane ka synjuk ïakura ka la khmih lynti ban ïaid kylleng ki district jong ka jylla khnang ban ïoh ïa kiba don sap bad kiba kynsai ki ban ïoh ïa ka lad ban mihkhmat ïa ka jylla sha katei ka lympung ïalehkai baheh duh jong ka ri ka ban sa long ha ka jylla Meghalaya.
