Shillong, Naitung 23
Ka Lummawbah ka la long sa kawei pat ka kynhun kaba la lah ban pynthikna ban jam sha ka quarter-final ha ka U-20 Fourth Division 2025 ba la pynïaid da ka Shillong Sports Association. Kane ka la wan urlong hadien ba ka la lah ban pynliem ïa ka Mawñianglah da 2-1 kol ha ka jingïalehkai ba ar jong ka Pool 3 ha ka Sngi Balang ha SSA Stadium, Polo.
Katba ka Mawkasiang ka la rung lypa sha ka quarter final na ka Pool 3 bad ka jingïakhun ka long na ka bynta ka kyrdan ba ar. Ka Lummawbah ka la ïoh ïa ka kabu namar ba ka la don ka jingïapher kol (-1 bad -2) bad kumta ka donkam tang ban ïakhaid, katba ka Mawñianglah pat ka donkam ban jop.
Ha kane ka jingïakhun ka Mawñianglah ka la ïoh ban pynkhih jar nyngkong ha ka minit kaba 19 lyngba u Elnathan Teinam Lyngdoh, hynrei dei ha ka minit kaba 54 ba ka Lummawbah ka la lah ban pynphai kylla lyngba ka penalty ba la shut da u Mewanshngaiñ Ryntathiang.
Ka Lummawbah ka la ïoh ban thep biang sa shi kol lyngba u Bajiedlang Rangslang (59) na ka bynta ban ïoh shi syndon ïa ka jingjop.
Ka jingïalehkai ha ka Sngi Palei kan long hapdeng ka Laitkroh pyrshah ïa ka Lumpyngngad ha ka por 4 baje nohphai sngi.
