Shillong, Naitung 23
U Vipin Raghuvanshi uba dei hynmen jong u Raja Raghuvanshi, u la wan poi sha Shillong ha ka Sngi Ba-ar ban pyrshah ïa ka jamin ba la ai ïa ki lai ngut kiba kynnoh ba ki la ïadon bynta lang ha ka ban pynïap ïa u Raja Raghuvanshi ha Riat Arliang kaba don ha Weisawdong, Sohra.
Kitei lai ngut kiba la ïohi jamin ki kynthup ïa u Silome James, u Lokendra Tomar bad u nongap pahara jong u, u Balbir.
Haba kren sha ki lad pathai khubor ha ka Sngi Ba-ar, u Vipin u la ong ba ka jingwan jong u sha Shillong ka long ban ïoh ïa ka syrnod ïap jong u para jong u, u Raja Raghuvanshi.
“Nga kwah ruh ban bishar bniah ïa ka kaiphod hadien ka jingïap (Post-mortem) khnang ban sngewthuh kham bha ïa ki jingjia kiba ïalam sha ka jingpynïap ïa u Raja,” u la ong.
U la pynskhem ba yn sa mudui hakhmat ka High Court ban weng noh ïa ka jamin jong kitei lai ngut kiba shah kynnoh.
Katkum ka jingong u Vipin, wat hapdeng ka jingkynnoh pyrshah ïa u Silome James halor ka jingdonkti jong u ban pynjot ïa ki sabut hynrei la ai jamin pat ïa u.
U Vipin u la kynnoh ba u hynmen jong ka Sonam, u Govind, u la pynkheiñ ïa ka jingshaniah jong ka longïing jong ki.
“Ha kawei ka liang, u Govind u la pynpaw ïa ka jingsngewsih halor ki kam jong ka para jong u bad u kam ba un ïeng ryngkat bad ngi ha ka ban wad ïa ka hok. Ha kawei pat ka liang, u la wan rieh sha Shillong bad thung nongïasaid aiñ na ka bynta ka para jong u ka Sonam bad u Raj Kushwaha. Kane ka jinglong arsap ka long kaba pynsngewsih shibun. Ka longïing jong ki, ka la thok ïa ngi hapoh ka jingda jong ka jingshongkha, bad mynta u Govind u dang bteng ban pynsngewsih da kaba trei pyrshah ïa ngi ha kaba rieh,” u la ong.
U Vipin un leit jngoh ïa ka Sohra, ka jaka ba la pynïap ïa u Raja bad thmu ruh ban pynlong ïa ka jingïaseng duwai na ka bynta ka mynsiem kaba la khlad noh.
U Vipin u la kam ïa ka bynta kaba kongsan jong ki paidbah ban ïarap ha ka ban sei madan ïa ka jingshisha halor kane jingjia. U la kyrpad ruh ïa ki paidbah ba kin ïai kyrshan ïa ka ïing ka sem jong u, ym tang ha kaba wad ïa ka jingshisha hynrei ban pynthikna ba ka hok kan long kaba biang.
