Imphal, Naitung:
Ka sorkar Manipur ka la pynmih ïa ka jingai jingmut kaba bniah ban khanglad ïa ka jingwan rungtuh ki nongwan buhai shnong beaiñ sha kane ka jylla, da kaba kdew ïa ka jingsngewkhia halor ka jingwan rung shabar pud kaba lah ban mih na ka jingkulmar ha ki ri ba marjan.
Ha ka dorkhas ba la pynmih ha ka sngi Balang, u N Ashok Kumar, u Commissioner-cum-Secretary (Home), u la bthah ïa baroh ki Deputy Commissioner bad ki Superintendent of Police ba kin pynneh ïa ka jingpeitngor kaba jur ha ki khappud jong ka pyrthei, hapdeng ki Jylla, bad hapdeng ki distrik.
La bthah ïa ki bor pynïaid ba kin buh ïa ka lad kaba khlaiñ ban khanglad ïa kano kano ka jingwan rung khlem jingbit shapoh ka jylla Manipur.
Ka jingai jingmut ka la ong shuh shuh ba kano kano ka jingjia kaba kum kane, lada lap, dei ban pyntip mardor.
Ki heh sorkar ki dei ban buh jingthoh da kaba bthah ïa ki jingtip ba bniah jong kito kiba shah bat.
Lada lap ba ki nongwan buhai ki rung be-aiñ dei ban buh ha ki jaka ba la buh kyrpang kiba shngaiñ, ha kaba lah ban ai jaka sah bad jingïarap ïa ki. Hynrei ka sorkar ka la ban jur ba ym dei ban ailad ïa kine ki briew ban ïakhleh lang ne ban kylla long ki nongshong shnong hapdeng ki nongshong shnong.
Ka dorkhas ka la bthah ruh ba baroh kum kine ki briew dei ban beh noh da kaba bud ïa ki kyndon aiñ kiba biang.
Ban pynthikna ïa ka jingpyntreikam kaba paka, dei ban thaw ïa ki komiti ha ka kyrdan distrik kiba kynthup ïa ki dkhot na ki pulit distrik ban pynlong ïa ka jingpeit bniah man ka por ha ki jaka ba la ithuh. Kine ki komiti kin don ruh ka jingkitkhlieh ban pynlong ïa ka jingpeit bniah man ka por ïa ka jinglong jingman.
Ki Deputy Commissioner ki la shah bthah ba kin buddien bha ïa baroh ki jaka rung jaka mih katkum ka Border Pass System kaba la don lypa.
La bthah ïa ki pulit ka thaiñ ban ithuh ïa ki briew ba thok bad ki briew kiba lah ban sah palat ïa ka por ba la ai jingbit ha ka jylla.
Kumba la thmu, la ong ba ïa kawei pa kawei ka kynhun treikam yn ïalam da u Additional Superintendent of Police bad kan kynthup ïa u nongmihkhmat na ka ophis jong u Deputy Commissioner, ki briew na ki kynhun shipai kum ka Assam Rifles, BSF lane CRPF katkum ka jingdonkam, bad ki nongtrei Biometric na ka bynta ban pynshisha ïa ka jingpynithuh bad jingpynshisha.
