Shillong, Naitung 24
Ka Technical Committee jong ka All India Football Federation (AIFF) ka la ai mynjur ïa ka kyrteng u Khalid Jamil kum coach ba ha khlieh duh na ka bynta ban pyndap ïa ka jaka kaba thylli hadien ka jingiehnoh kam u Manolo Marquez.
Lada u Jamil u ïoh ïa ka jingmynjur na ka executive committee jong ka AIFF, un sa long u nong India ba nyngkong eh ban shimti kum coach ba pura naduh u Sukhvinder Singh ha u snem 2005. Ki la don sa ar ngut kiwei pat ki nong India – u Armando Colaco bad u Savio Medeira, kiba la shimti shipor hadien ka jingshah weng noh u Bob Houghton ha u snem 2011.
“Ngi la don shibun ki aplikeshon, bad hadien ba ngi la bishar bniah, ka technical committee ka la ai jingmut ïa lai tylli ki kyrteng sha ka executive committee,” la pynpaw u team director ka AIFF u Subrata Paul ha ki lad pathai khubor hadien ka jingïalang jong ka technical committee. “Ngi ngeit ha ka jinglah jong kine lai ngut ki coach. Ki lah ban rah kham shakhmat ïa ka kynhun ïalehkai ka ri jong ngi.”
U Stephen Constantine, uba don ka jingkyrmen ban shimti ha ka sien kaba lai bad ka kynhun ïalehkai ka ri hadien ba u la pynjop saw tylli ki khusnam ha ki por ba la dep, u dei ba ar ban paw kyrteng ha ka thup kyrteng, katba u coach barim ka Slovakia bad Kyrgyzstan u Stefan Tarkovic ruh u la paw ha katei ka thup.
“Baroh ki coach ki don la ki jong ki bynta ba khlaiñ, u Khalid u la leh bha haduh katta-katta ha ka I-League bad ha ka Indian Super League (ISL).
U Constantine u tip bha ïa ka phutbol ha India na shapoh bad shabar, bad ka India ka la ïalehkai bha ha ka Asian Cup ha u snem 2019. U Tarkovic u don ïa ka jingshemphang kaba bha ha ka national team, hadien ba u la ïalehkai bad ka Slovakia bad Kyrgyzstan,” ong uwei pat u heh sorkar.
Ka technical committee ka la kyrshan ïa u Jamil na ka bynta ka kam ba ha khlieh duh, haba kheiñ ïa ka rekod jong u ha ka jingïalehkai phutbol hapoh ka ri. Wat hapdeng ka jingduna ki lad ki lynti, une u rangïalehkai barim jong ka ri u la jop ïa ka I-League ryngkat bad ka Aizawl FC ha u snem 2017. Hadien kata u la khring ïa baroh da ka jinglah ban pynrung sha ka semi final ha ka ISL bad ka Northeast bad ka Jamshedpur FC, ka kynhun kaba u dang ïai bteng kum u coach.
“Ka AIFF mynta kan sa ïakren bad ki coach kumjuh kan sa bishar bniah ïa ki jingdawa tulop jong ki. Lada u Khalid u mynjur ïa ki kyndon, un sa ïoh ban shimti ïa ka kam kum u coach ka India,” la pynpaw uwei na ki heh ka AIFF.
