Shillong, Naitung 24
Ka Kong Biolin Pyrtuh, President ka Meghalaya Greater Shillong Progressive Hawkers and Street Vendors Association (MGSPHSVA) ka la kynnoh ba kawei ka seng die madan ha Khyndai Lad kaba don ha ka shatri jong ka Roadside Hawkers Association (RHA) hapoh ka jing-ïalam ka Kong Tellme Nongbri ki dei kiba ïada bha ïa ki bar jylla ban ïoh ïa ka Certificate Of Vending (COV).
Kane ka jingkynnoh ka Kong Biolin ka dei hadien kiba bun ki bar jylla kiba la don dukan ha kiwei ki jaka, hynrei ki dang ïoh pat ïa ka COV ban shong die jingdie biang hapoh MUDA, ka jaka ba la shna kyrpang da ka Sorkar.
Haba ïakren bad ka Kong Biolin ha ka Sngi Palei, ka 24 tarik u Naitung 2025, ka la ïathuh ba na ka seng jong ki, kim shym la ïada ïa ki bar jylla ban pynïoh ïa ka COV. Wat la ki don ki bar jylla kiba donlang ha ka shatri jong ka seng jong ki ruh, hynrei kim shym la ïoh ïa ka COV.
Shuh shuh ka la kynnoh ruh da kaba ong, ba kane ka jingïoh COV kitei ki bar jylla ka dei beit ka jingïada jong katei ka kynhun ba shong die madan ba la tip kum ka Roadside Hawkers Association, katba ki Khasi jong ngi pat ki la duh ban ïoh ïa ka COV.
Ka la pynpaw ruh ba lada kitei ki kynhun ki sngewrem ïa kane ka jingkynthoh jong ka ki mad rem, namar nga ïathuh ïa ka jingshisha.
Ka seng jong ngi kam dei ka seng ba ïada ïa u bar jylla, hynrei katei kawei pat ka kynhun ba shong die madan ki ïada ïa u bar jylla, ha kaba ïa u bym dei hok ruh ki pynkam hok, la ong ka Kong Biolin.
“Naduh ba sdang ngi la ïakhun ba kawei ka longïing kawei ka laisen ki dei ban ïoh. U don uwei u bar jylla uba ïoh ar tylli ki laisen; kawei ïa ka lok bad kawei ïalade bad kumno uta u bar jylla u ïoh ar tylli ki laisen,” buh jingkylli ka Kong Biolin.
Namar kata, ka la pynpaw ïa ka jingbym sngewtynnad ba ka sorkar ruh kan pdiang ïa kita ki bym dei hok ban ïoh, da kaba khot ruh ïa ka sorkar ba kan wan ban peitbniah hi dalade khnang ban lap ïa ki jingshisha.
Haba kylli pat halor ka jingbym ïoh COV kiba bun ki Khasi ba shong die madan, ka Kong Biolin ka la pynpaw ïa ka jingsngewktah ka mynsiem hadien ba ki bun kiba shong die madan kim shym la pat ïoh ïa ka COV na ka Shillong Municipal Board (SMB).
Ka la ïathuh ba ki longkmie Khasi ki la ïam sngewsih tang namar ba kim pat ïoh ïa ka COV bad lada ki kwah ban leit shong die jingdie ha parking lot MUDA ruh kim ïoh namar ka Municipal kam pat shah ba kin leit shong kat bym pat ïoh ïa ka COV. Kumta ka Kong Biolin ka la kyrpad ïa ka Shillong Municipal Board (SMB) ba kan sngewbha ban ai noh ïa ka COV ïa kine ki bym pat ïoh haduh mynta, namar shaei kin leit bylla lada duh ban shong die jingdie.
La ïohi ruh ba ki nongshong die madan ki bym pat ïoh ïa ka COV kynthup ïa ki Khasi bad ki bar jylla ki la pynlong jingïakhih da kaba rah plakad ha parking lot MUDA, ban pyrshah ïa ka Municipal Board ka bym shym la ai ïa ka COV wat lada ki la dep ban leit mih man ka por sha ophis.
