Shillong, Naitung 24
Ka Sorkar Jylla ka la jop ban pynkynriah ïa ki nongdie jingdie sha ka mala ba nyngkong jong ka jaka ïeng kali ka MUDA ha Khyndai Kad, Shillong.
Haba pynbna ïa kane ha ka Sngi Palei, u nongaiktien ka Sorkar MDA-II uba dei ruh u Myntri ka Sorkar Jylla, Bah Paul Lyngdoh, u la ong, “Ha ka jingïatreilang bad ki bor synshar District, ka Sorkar ka la pyndep ïa ka jingpynkynriah ïa baroh kine ki nongdie madan kiba dei hok ha ka mala ba nyngkong jong ka jaka ïeng kali ka MUDA ha Khyndai Lad.”
Da kaba khot ïa kane ka sngi kum ka sngi ba kongsan na ka bynta ka sorkar, u Bah Lyngdoh u la ong, “Ka dei shisha ka sngi ba kongsan na ka bynta ka Sorkar Meghalaya kumba phi tip ngi la buddien bha ïa ka kam kaba ïadei bad ka jingpynkynriah ïa ki nongdie jingdie bad ki nongdie madan ha Khyndai Lad.”
“Ka la shim por kham bun ban ïa kaba ngi la pyrkhat hynrei nangta baroh ki long kiba bha kiba kut bha bad ngin sngewkmen ban ïohi ïa ka dur kaba thymmai bad ka jingpynkylla dur kaba la ai ïa ka Khyndai Lad lyngba kane ka jingpynkynriah ïa ki nongdie jingdie,” u la bynrap.
U Bah Paul u la pyntip ba la pynlong ïa ka jingwad bniah ban tip ïa ki nongdie jingdie kiba dei hok, ha kaba ki don 1,400 ngut ki nongdie madan kiba la ïashim bynta. Na ki nongdie marbam ba la jurip, 407 ngut la shim ba ki dei hok ban ïoh ïa ki kot pynshisha jong ka jingdie madan (COV), ha kaba 311 ngut ki la lum ïa ki kot pynshisha jong ki.
Ïa ka jingai ïa ki jaka die marbam la leh lyngba ka jingthep ‘vote’ kaba shai, kaba pynthikna ïa ka lad kaba mar katjuh na ka bynta baroh ki nongdie madan ba la pynskhem.
“Mynta ban pynsuk ïa ka jingpynkynriah, la shna 365 tylli ki jaka die marbam na kine haduh 282 tylli la ai bynta bad kine mynta ki la shong ha ki jaka die bapher bapher lyngba ka jingthep ‘vote’ kaba shai,” u la ong.
Haba bynrap u la ong, “Ka jaka kaba don hakhmat ne shadien la ailad ïa baroh ban ïoh ïa ka jaka lyngba kane ka jingthep vote.”
Haba kylli, u Bah Paul u la ong, “Ngin pynlong bynta ïa ki kam ha ka rukom ba ngin shim kaba dei ka bynta ba kongsan nyngkong. Kumta, ha ka skhim jong ngi kiei-kiei kaba nyngkong eh ka dei ka jingpynkynriah jaka kaba ngi la leh da kaba jop.” U la pynkynmaw ruh ba ïa kane ka jingïakhun la leh da ka jingkyrshan bad jingïatreilang kaba radbah jong baroh ki nongdie madan.
“Ha kaba sdang ka la don ka jingpyrshah kaba pura wat ïa ka jingmut ban pynkylla. Hynnin ka sngi phi lah ban ïohi ba ka la don ka laiñ jong ki nongdie jingdie kiba pyrshang ban ïoh jaka bad ka dukan, kumta ka dei ka jingkylla kaba khraw na kaba pyrshah sha kaba ïalehkai shisha ba em, em nga dei ban ïoh nyngkong,” u la pynpaw.
Lait na kata, u Myntri u la pynpaw ba ka sorkar jylla ka la ai ka jingsiew kaba shisien siew kaba T.10,000 bad ka baibam kaba T.2.000 shibnai na ka bynta san bnai ban pynduna ïa kano-kano ka jingduhnong ha ka ïoh ka kot. U la pynthikna ruh ba yn pynbiang lut ïa ki jingdonkam baroh sha ki nongdie jingdie kiba la pynkynriah jaka.
Ha kawei pat ka jingkylli, u Bah Paul u la ong ba ka sorkar kam shym la ïoh ïa kum kine ki khubor ba la knieh ïa ki COV. Hynrei lada phi peit ïa ki jingkheiñ ngi dang don tang khyndiat ki dukan kiba sah bad ngin pynthikna ba baroh kin ïoh ïa ka jingshakri kaba mar katjuh bad katkum ka nongrim ba ka synshar aiñ ka dei ban jop,” u la pynskhem.
