Imphal, Naitung:
Ki bor pahara ki la pynlong ïa ki jingïaid lynti kiba ïatreilang ha kylleng ka Manipur hapdeng ka 21-23 tarik u Naitung, 2025, kaba la pynlong ïa ki ban kem ïa ki lehnoh kiba ehrang na ki kynhun lehnoh bapher bapher kiba donkti ha ki kam dawa pisa kiba la saphriang bha kiba thmu ïa ki kam khaïi, ki jaka pule, bad ki tnad sorkar.
Ki jingkhynra ki la ktah jur ïa ki kynhun dawa pisa kiba la ju thmu beit ïa ki jaka treikam kiba dei hok ha kylleng ki jaka them bad ki thaiñ khappud jong ka jylla.
Ka jingkem kaba jur tam ka la jia ha ka 23 tarik u Naitung ha kaba ki shipai ki la kem ïa arngut ki dkhot ba ehrang jong ka KCP (Taibanganba) kiba la thmu kyrpang ïa ki jaka pule bad ki tnad sorkar.
U Konjengbam Kanta Meitei, 23 snem ka rta, u dei uba la shah kem na Khuyathong ha Imphal West District, katba u Sanatomba Aheibam, 24 snem ka rta, u dei uba la shah kem na ki thaiñ Takyel Khongbal.
Ki bor pahara ki la ïoh kurup T.22,000 ka pisa dawa pisa, lai tylli ki Mobile Handset, bad T.8,220 tyngka ka pisa na ki.
Ha kane kajuh ka sngi la ïohi ïa ka jingkem ïa u Hidangmayum Naocha Sharma 35 snem ka rta uba dei u shipai KCP (MC) uba trei shitom na Bisnupur uba ju pynïaid ïa ki kam dawa pisa pyrshah ïa ki jaka khaïi bapher bapher ha katei ka thaiñ.
Ki shipai ki la kem ruh ïa u Sanabam Ibungo Meitei, 27 snem ka rta, u nongtrei jong ka KCP (PWG) uba la thmu kyrpang ïa ki pump umphniang ha kylleng ka them. La ïoh kurup hynriew tylli ki kot jingdawa na ka seng jong u ryngkat bad kawei ka Mobile Phone, kaba pynpaw ïa ka jinglong ryntih jong ki kam dawa pisa.
Uwei u samla PREPAK PRO uba dang 18 snem ka rta uba la tip kyrteng kum u Sorokhaibam Olen Meitei u la shah kem na ki thaiñ Tabungkhok Sagei Brick Field, ha ryngkat ki artylli ki Mobile Phone na kti jong u.
Ki bor pahara ki la ïoh ïa ka jingjop ha ka 22 tarik, Naitung, da kaba ïohkem ïa arngut ki lehnoh na ki jaka khlaw hapdeng ki Border Pillar 73(10) bad 73(11) ha Tengnoupal distrik.
Kine ki briew kiba la shah kem ki kynthup ïa u Thingnam Amujao Singh uba 57 snem ka rta uba dei u dkhot jong ka PREPAK bad u Kangjam Motea Meitei uba 33 snem ka rta na ka seng PLA.
Ha kane ka juh ka sngi ki bor shipai ki la ïoh ban kem ïa u Waribam Ajoy Singh 25 snem ka rta uba dei u dkhot jong ka RPF/PLA na ka thaiï Langol ha Imphal West distrik. .
Kane ka jingpyntreikam, ka la sdang naduh ka 21 tarik, Naitung, da kaba kem ïa u Boythong Khongsai, 29 snem ka rta, uba dei u shipai jong ka UKNA, na surok Sugnu-Chandel.
Ki shipai ki la ïoh kurup ïa ka thuk thuk Royal Enfield, ka mobile phone, ki Sim Card, bad ki kot ki sla bapher bapher na ka kti jong u.
