Kharkutta, Naitung 24
Ki pulit ha ka step jong ka Sngi Palei ki la ïoh ban kem ïa uwei u briew ba la suba jur ba u donkti ban rahbor ïa ka heprit 6 snem najan ka ïing jong ka hajan Kharkutta ha North Garo Hills. Kane ka jingïoh kem ka la long hadien ka jingïatreilang jong ki pulit ka district bad ki nongshong shnong jong ka Mittegittim hajan ka Adokgre.
Ha ka Sngi Saitjaiñ, ka 18 tarik u Naitung, ka heprit kaba dang 6 snem ka rta, ïa kaba la ïohi khatduh habar ïing jong ka ha ka por kumba 11 baje mynstep, la suba ba ka la shah rahbor bad ha kaba la pynlong ïa ka jingwad bniah ha katei ka jaka na kaba ka la jah. Ha kane ka jingwad la ïadonlang ki pulit ka North Garo Hills ryngkat bad ki nongshong shnong kiba tip bha ïa ka jinglong jong ka jaka hynrei wat hadien lai sngi ba la wad, katei ka khynnah ka dang jah rngai. Ka jaka kaba katei ka khynnah ka la jah, ka long kaba rben bha da ki jingthung jingtep, kaba la wanrah jingeh ha ka jingwad ban pyllait ïa katei ka heprit.
Ïa utei u briew ba la kem la tip kyrteng kum u Sonjith Arengh, uba la jah rngai naduh ka sngi ba katei ka heprit ka jah. La ïathuh ba u Arengh u la sah miet ha ka 22 tarik Naitung ha ka thaiñ Rongjeng bad nangne u la leit sha Adokgre Mittegittim ha ka sngi ba bud. Halor ka jingïoh ïa ka khubor ba thikna, ki pulit ki la poi ha Mittegittim ha ka por 6:30 janmiet jong ka Sngi Balang ban kem ïa u. Hynrei, u Arengh u la phet krad mar sien ïohi ïa ki pulit.
Dei ha ka step jong ka Sngi Palei, ki nongshong shnong ka Adokgre Mittegittim ki la bat ïa utei u briew ha ka por 7 baje mynstep bad ki la aiti noh ïa u sha ki pulit ha ka por 11 baje mynsngi. Utei u briew u don mynta ha ka kti ki pulit ka thanat Kharkutta bad ka jingtohkit ka la ïaid shakhmat.
Ki pulit ki la pyntip ba ïa u Arengh yn sa ïalam tiañ bishar lashai ka sngi hakhmat ka ïingbishar.
Ka khubor ka ïathuh ba u Sonjith Arengh u dei u briew uba la donkti teng ha ki kam bymman bad u dei uba la shah pynngat teng ruh ha ka aiñ Protection of Children from Sexual Offences (POCSO) Act.
Ha u snem 2017, u la shah pynngat hapoh ka mukotduma POCSO ha thanat Kharkutta hynrei u la ïoh jamin noh bad ban don hapdeng ka jingshah tian bishar ha ka District Court. Hynrei la ong ba ha u snem 2025, u la leh biang sa ïa kawei ka kam bymman hapoh ka aiñ POCSO bad naduh katei ka por u la phet rieh.
