Nongpoh, Naitung 24
Uwei u rangbah u la duh noh ïa la ka jingim hadien ba shah tynrah ha kawei ka kali rong ïong ka bym lah satia ban ithuh ha ki bynta jong ka surokbah National Highway 6 kaba dang hap ha ka thaiñ Sumer ha Ri Bhoi District.
Haba ïoh ban ïakren bad u Senior Superintendent of Police ka Ri Bhoi District, u Vivekanand Singh Rathore, u la ïathuh ba katei ka jingjia ka dei kaba la jia ha ka por kumba 11 baje eiei tam ne duna ha kaba katei ka kali rong ïong ka la leit ban tynrah ïa utei u rangbah uba la tip kyrteng kum u Terence Thangkhiew na Lai Mer, Upper Shillong ha East Khasi Hills District.
Shuh shuh, haba wad jingtip halor katei ka jingjia, la ïathuh ba ïa utei u rangbah la pynkit sha Umsning CHC ha shwa ban wan poi ki bor pulit bad namar ka jingjur jong ka jingmynsaw, la pynkynriah noh mar-mar sha Woodland Hospital, Shillong ha kaba la ïoh jingtip ba utei u rangbah u la khlad noh namar ka jingjur jong ka jingmynsaw.
Kumba ka long mynta, na ka liang jong ki bor pulit ka thanat Umïam ki dang pynlong ïa ka jingthwet kaba jur ban lapdien ïa katei kali rong ïong kaba donkti halor kane ka jingjia.
