Mairang, Naitung 24
Ka Pyndengumïong District Sports Association (PDSA) ka la plie ïa ka lympung ïalehkai phutbol ba la tip kum ka Mairang Super League 2025 ha ka Sngi Palei ha madan Dom Mawlum kaba ha Pyndengumïong, Mairang.
Ha katei ka sngi sdang, ka kynhun ïalehkai jong ka Mishon SSCC ka la ïoh jingjop hadien ba ka la pynliem noh ïa ka Mission United FC da 2-0 kol.
La pynshngaiñ lang ha katei ka sngi da u President ka Meghalaya Football Association (MFA) u Bah Hamletson Dohling kum u kongsan ha ryngkat ka jingïadonlang u President ka PDSA u Bah L. Nongrang, Secretary u Bah R. Nongsiej, u Sordar ka shnong Pyndengumïong u Bah Bornad Syiemïong, u Sordar ka shnong Mission u Bah B. Rani, ki dkhot ka synjuk lem bad kiwei kiba la shah khot sngewbha.
Ha katei ka sngi u Bah Hamlet ula ïoh ruh ban aiti ïa ka Ambulance sha ka Pyndengumïong District Sports Association kaba ula pynïoh lyngba ka Chief Minister Special Development Fund na ka bynta ban pynbiang ïa ka jingdonkam ha ka liang ka koit ka khiah ki nongïalehkai haba don kano kano ka jingjia.
Haba ai jingkren kum u Kongsan u Bah Hamlet, u la ai khublei ïa ka PDSA kaba la long kawei ka dkhot jong ka MFA kaba shim khia ban bud beit ryntih ïa ka almanak ïalehkai jong ka MFA ban shim khia ïa kane ka kam kaba la ai jingmyntoi ïa ki samla ha kane ka thaiñ.
U la ong ruh ba ka jingdon kane ka Ambulance kan ai ka jingshakri kaba bha ïa ki paidbah khamtam ïa ki samla ïalehkai namar ha ka jingïalehkai ka ambulance ka long kaba donkam bha ban pynsuk ïa ki nongïalehkai.
