Shillong, Naitung 24
Ha ka Sngi Palei ka 24 tarik u Naitung 2025, ka Shillong Municipal Board (SMB) ka la lah ban weng lut ïa baroh kiba shong die jingdie ha shilynter ka lynti ïaid kjat ha Khyndai Lad sha jaka ïeng kali MUDA ba la shna kyrpang da ka Sorkar Jylla.
La sakhi ruh ba ka lynti ïaid kjat ha Khyndai Lad ha kane ka sngi ka la kylluid war, khamtam ka jaka ba ju shong die jingdie hakhmat ka MUDA bad ka Centre Point, kaba dap da ki nongshong die madan.
Kane ka sngi ba la kylluid ka Khyndai Lad ka dei ba hynnin ka sngi ki ophisar ka Shillong Municipal Board (SMB) ki la pynkut noh ïa ka jingtasali ïa ki Certificate Of Vending (COV) na kiba shong die jingdie ha katei ka thaiñ.
Ka SMB ha ka Sngi Balang ka la pynlong ruh ïa ka jingkhalai nusib ïa ki dukan, bad kiba ïoh ïa u nombar kin sa leit shong ban die jingdie ha katei ka jaka ba la shna kyrpang da ka sorkar.
Na ka liang kiba shong die madan baroh ba kynthup ïa ki Khasi bad ki bar jylla ki la rah ïa la ki tiar sha jaka ïeng kali MUDA ban shong ha la ki jaka bad nombar ba la bynta ba ki ïoh lyngba ka jingpynkhalai nusib ka SMB.
Ha ka por mynstep ki la don kiba dang phriang ïa la ki mar ha lynti ïaid kjat ha Khyndai Lad, hynrei ki ophisar ka Shillong Municipal Board (SMB) pat ki la phah lum lut ïa baroh kitei ki dukan bad la sakhi ba kam shym la don shuh ka jingpyni bor ne leh pyrshah.
Ki nongdie madan ha kitei ki jaka kynthup kiba la don ïa ka COV bad ki bym pat don ruh ki la kohnguh ban lum noh ïa la ki mar ban leit shong sha jaka ïeng kali ha MUDA.
