Shillong, Naitung 24
Shi bynta ban pynkhreh na ka bynta ka samoi ïalehkai ka ban wan, ka Meghalaya Cricket Association (MCA) ha ka Sngi Palei ka la pynbna ïa ki 32 ngut rangïalehkai (senior) na ka bynta ki lympung ïalehkai 2025-26 jong ka BCCI.
Ka selection committee na ka bynta katei ka kynhun ka la poi sha kane ka thup hadien ba la bishar bniah ïa ka jingïalehkai jong ki nongïalehkai ha ki prokram ïalehkai (selection trial) ba la pynlong dangshen bad kumjuh ruh ïa ki jingtbit jong ki ha ka samoi ïalehkai 2024-25 bad 2023-24.
Ïa ka kynhun ïalehkai ka Jylla yn pyndap da ki lai ngut nongïalehkai kiba nabar (guest professional players). Ki nongjied ki la pynap lypa ïa u Bipin Kumar Ray lada jia ba u Adarsh Joshi um ïoh jingbit na ka BCCI.
Ka MCA kan pynlong ïa ki jingïalehkai ba khatduh bad ka jingpynkhreh ha ka taïew ba nyngkong jong u bnai Nailur bad la ai jingmut ïa ki nongïalehkai ba la don ha ka thup ba kin ïaid shakhmat ïa ka jingkilanmet, la pynpaw kat kum ka kyrwoh ba la pyllait da u Secretary ka MCA, u Rayonald Kharkamni.
Na ka bynta ka kynhun ïalehkai ‘senior’, ïa kane ka samoi ïalehkai yn sdang da ka Ranji Trophy kaba nyngkong eh naduh ka 15 tarik u Risaw bad bud sa ka T20 Syed Mushtaq Ali Trophy ka ban sdang naduh ka 26 tarik u Naiwieng bad ka one day Vijay Hazare Trophy ka ban sdang naduh ka 24 tarik u Nohprah.
Ki rangïalehkai kiba la don ha ka thup ki long u Anish Charak, Bijon Dey, Adarsh Joshi (standby Bipin Kumar Ray), Agreas Chamcham A Sangma, Arpit Bhatewara, Bibek Poudel, Kishan Lyngdoh, Swarajeet Das, Akash K Chaudhary, Himan C Phukan, Swastic Chettri, Yogesh Tiwari, Jaskirat Singh Sachdeva, Chengkam Sangma, Ram Gurung, Arien B Sangma, Mewada Shylla, Arbin Singh, Badonnam John Mylliemngap, Kush Agarwal, Abhishek Gupta, Aaron AR Nongrum, Rohit Shah, Abhishek Kumar, Aryan Borah, Tarique A Siddique, Bamanbha Shangpliang, Riboklang Hynniewta, Dippu Sangma, Lerry G Sangma, Rahul Shah bad u Sengsrang K Sangma.
