Shillong, Naitung 24
Ka lympung ïalehkai 31st State Level Inter School Karate Tournament 2025 ka la sdang ha ka Sngi Palei ha Multipurpose Indoor Stadium jong ka SAI Training Centre, Shillong ha kaba la wan ïashim bynta kumba 742 ngut ki nongïalehkai.
Kine ki kynthup ïa 350 ngut ki khynnah kynthei bad 392 ngut ki shynrang na 104 tylli ki skul ba kynthup na ri lum Khasi, Jaiñtia bad Garo.
Ïa kane ka lympung la pynïaid da ka All Meghalaya Karate-Do Association (AMKA) ha ryngkat ka jingkyrshan lang da ka tnat ïalehkai jong ka Sorkar Jylla. La plie ïa kane ka lympung da u Deputy Inspector General of Police (Eastern Range) u Davis NR Marak (IPS) kum u kongsan bad u Bah John F Kharshiing, Working President ka Meghalaya State Olympic Association (MSOA) kum u symbud kongsan ha ryngkat ka jingdon lang ki dkhot ka AMKA.
Katba ïa ka jingïalam ban bam smai shwa ban sdang ka jingïalehkai la ïalam da ka Esaranaki Kharjana, ka ‘thei ïalehkai kaba dang shu ïoh khur ïa ka takma rupa ha ka National Cadet Tournament, kaba la long ha Dehradun mynshem bnai.
Haba ai jingkren ha katei ka sngi, u Davis Marak um lah khlem da pyrto ïa ka AMKA kaba la lah ban pynlong ïa kane ka lympung kaba heh tam ha ka Jylla, da kaba u la ong ban lah ban lum ban lang haduh 104 tylli ki skul kam dei ka kam kaba suk, kaba da kylla kane ka dei ka dak jong ka jinglen lade bad aiti met bad mynsiem da ki dkhot jong ka AMKA, nalor katta u la ai khublei ruh ïa ki coach bad ïa ki kmie ki kpa jong ki khynnah, kiba ïai kyrshan bad ai mynsiem ïa la ki khun.
Katba na ka liang u Bah John u la pynkynmaw ïa ka jingsdang ïaid jong ka por kaba nangjan sha ka lympung ka National Games ka ban sa long ha kane ka Jylla ha u snem 2027, ha ka juh ka por u kyrmen ba ki nongïalehkai karate jong ka Jylla kin lah ban paw bad ban tyngshaiñ bha ïalade.
Ha kane ka sngi plie ïa kane ka lympung, ka AMKA ka la pynkup burom ïa ki katto-katne ki nongïalehkai bad kumjuh ïa ki coach kiba la lah ban wanrah ïa ka nam bad burom ïa ka Jylla ha kine ki khyndiat bnai ba la dep. Kine ki kynthup ïa ka Kynjailin Lyngdoh Mawnai, kaba la ïoh khur ïa ka takma rnong na ka bynta ka ri na ka 9th South Asian Karate Championship, ba la long ha Colombo, Sri Lanka.
Kiwei kiwei pat ki nongïalehkai kiba la pynkup burom ki kynthup ïa u Ferdinand Samkupar Rani, Gideon Tym-puiñ, Gregorwilson Makdoh, Larisha Kurbah, Esaranaki Kharjana, Daphishisha Shadap, Royal Jayden Laloo. Katba ki coach kiba la shah pynkup burom ki kynthup ia u Bah Donboklang Lyngdoh, Sunil Rathee, Rodrick Syiem, Edwilbert Kyntiewbor Nongkynrih bad ka Ester Mary Lyngdoh.
Ha shwa ban sdang ïa ki jingïakhun, ka la don shwa ka demonstration kaba la pyni da ka kynhun ki samla kynthei bad shynrang.
