New Delhi, Naitung:
Lai ngut ki runar ki la shah kem hadien ba ki la donkti ban leh be-ijot ia ki khynnah hapoh ka jaka set shapoh khyndew kaba ki la buhrieh bha ha ka thaiñ Brent jong ka nongbah Alabama. La ong ba kitei ki suba donkti ki la shah kynnoh ba ki la leh be-ijot bad khaïi ia hynriew ngut ki khynnah la palat shisnem mynta.
Katkum ki kot ki sla jong ka ïingbishar ba la ïoh da ka AL.com, la ong ba katei ka jingshah kynnoh leh be-ijot ka la sdang ha ka sngi snem thymmai jong u 2024 bad ka la iai bteng haduh ka 29 tarik u Lber jong u 2025, ha kaba la kem ïa kitei ki runar. Kitei kiba la shah leh be-ijot, ki kynthup ia kawei ka khynnah kynthei kaba dang 3 snem bad uwei u khynnah shynrang uba 6 snem, ki dei kiba hapdeng ka rta kaba 3 haduh 10 snem.
Katkum ki kaiphod ba la ioh lum, la ong ba kitei ki khynnah ki la shah leh be-ijot ha bun ngut ki ‘riew khlem-akor kiba siew da ka dor ha kitei ki nongpyn-iaid jong katei ka jaka die ia ki khynnah.
Ka jingtohkit ka la sdang ha u bnai Rymphang 2025 hadien ba ka ophis jong u heh ka Bibb County ka la ïoh jingtip ba katei ka jingshah lehbeiñ ki khynnah ka la jia ha kawei ka kamra shapoh khyndew, ba la buhrieh bad pyntreikam be-aiñ da kitei ki runar la shisnem kynthih.
Ha ka jingwad bniah bad jingtohkit jong ka tnat tohkit ki pulit katei ka nongbah, u nongshah suba ba nyngkong u dei u William Chase McElroy ba la don 21 snem ka rta, uba la shah kem ha ka 11 tarik u Rymphang jong une u snem bad u la kam ba u la leh beijot la kumno kumno ia iwei na kitei ki khyllung kynthei.
Mynta u dang shah set ha ka patok jong ka Bibb County katba dang bishar bniah ia kiba bun tylli ki jingshah kynnoh kiba iadei bad katei ka jingleh kam be-aiñ jong u, kynthup ïa saw tylli ki kyndon pynkheiñ aiñ ba iadei bad ka jingleh be-ijot ia ki khyllung- khynnah, 6 tylli ki kyndon pynkheiñ aiñ ba iadei bad ka jingkhaii briew bad 4 tylli ki kyndon pynkheiñ aiñ ba iadei bad ka jingrahbor ia kitei ki khyllung- khynnah.
Ha ka 25 tarik u Lber, la ioh kem sa ia uwei pat uba la tip kyrteng kum u Dalton Terrell, 21 snem ka rta. U la pynpaw ruh ba u la leh be-ijot ia utei u khynnah shynrang, katkum ki kot ki sla bad ki kaiphod ba la ioh lum da ka ïingbishar jong katei ka nongbah.
Kumta, la pynngat ia u hapoh ki 6 tylli ki kyndon pynkheiñ aiñ jong ka jingleh be-ijot, 5 tylli ki kyndon pynkheiñ aiñ jong ka jingkhaïi briew bad ia utei u runar ruh la kem bad set patok shuwa katba dang pyniaid ia ki jingtohkit bad haduh ba ynda ioh ban bishar bniah ia ki kam be-aiñ jongki baroh.
Hadien 4 sngi ba la pyniaid ia ka jingtohkit bad jingwad bniah, la ioh kem sa ia uwei pat u nongshah kynnoh ba lai, uba la ithuh kyrteng kum u Andres Velazquez-Trejo, 29 snem ka rta bad u la shah pynngat hapoh ki 6 tylli ki kyndon pynkheiñ aiñ ba iadei bad ka kam khaii briew. Mynta u don ha patok bad hapoh ka jingkhmih jong ki bor ka aiñ namar ka jingpyniaid iew bad kamai pisa da kaba die ia kitei ki dur lyngkhuid jong kitei ki khynnah kiba shah leh be-ijot baroh.
U heh ka Bibb County, u Jody Wade, u la maham tyngeh ba ki bor pyniaid bad ki bor ka aiñ kin nym ailad ia kum kane ka jingjia ba kan nang wan jia biang nangne shakhmat bad ba ki nongleh kam sniew kin mad ïa ka jingshah pynngat kyndon katkum ki jingleh pynkheiñ aiñ jongki hi.
