Shillong, Naitung 24
Ka Kharang SC bad ka Umlyngka SC ki la ïoh jingjop ha ka lympung ïalehkai SRGT 3rd Division Football League 2025 ba la pynïaid da ka Shillong Sports Association (SSA) ha ka Sngi Palei.
Ha ka jingïalehkai jong ka Group-C, ka Kharang ka la pynliem noh ïa ka Gorkha Association da 3-1 kol na ka bynta ban ïoh ïa ki lai point kiba nyngkong hadien ba ka la mad ïa ka jingshah rem ha ka jingïalehkai ba la dep.
Watla ka Gorkha ka la ïoh ban thep kol nyngkong lyngba u Yash Kanwar ha ka minit kaba 23, hynrei ka la shah pynphai kylla haduh lai kol ha ka kylla miet lyngba u Robenroy Warlarpih (67), Blesson Warlarpih (76) bad u Albest K. Sohnoh (81).
Haba phai sha ka jingïalehkai jong ka Group-B, ka Umlyngka ka la bteng ïa ka jingjop ba ar hadien ba ka la pynliem noh ïa ka Rynjah SC da 5-0 kol. U Chester Makroh u la thep ar kol ha ka minit kaba 33 & 76, katba ïa kiwei pat la thep da u Bastius Nongbsap (11), Samborlang Nongbsap (57) bad u Mario Shanpru (67).
Da kane ka jingjop ka Umlyngka ka la ïoh ban lamkhmat ha katei ka group ryngkat 6 point na ar sien ïakhun, katba ka Rynjah ka dang sah 1 point.
Ka jingïalehkai ha ka Sngi Thohdieng kan long hapdeng ka Lamlynti FC pyrshah ïa ka Mawkriah West SC ha ka por 1:30 mynsngi, katba ka Umrynjah SC ïa ka Imson SC ha ka por 4 baje nohphai sngi.
