Shillong, Naitung 25
Ka Hima Sohra Tourism Committee (HSTC) ka la pynbna paidbah ba kan khang noh shwa ïa ki jaka ban pynlong jaka bam khana, jaka ïabam ïadih, jaka shet sha ki lum ki wah ha baroh ki jaka ba hap hapoh ka jingpeit jingkhmih ka Hima Sohra.
Ïa kane la pyntip da ki nongïalam ka Hima Sohra ha ka Sngi Thohdieng ka 25 tarik u Naitung 2025 haba ïakynduh bad ki lad pathai khubor ha Shillong Press Club.
Kane ka jingkhang ka Hima Sohra ka dei halor ka jingkynthoh ïa ki jinglap ba dang shen jong ka jingbret pathar ïa ki jaboh jabaiñ da ki kynhun ba wan bam khana la ka long na ka jylla bad shabar ka jylla ha shilynter ka surok Mawkdok-Sohra bad kiwei-kiwei ki bynta kiba hap hapoh ka jingpeit jong ka Hima Sohra.
Haba kren sha ki lad pathai khubor, u nongaibuit ka Hima Sohra Tourism Committee (HSTC), Bah Alan West Kharkongor, u la ïathuh ba la buh ïa ki kyndon ban khang leit bam khana bad ban shet jingshet bad lada ki wan ban bam khana sha Sohra ki briew ki dei ban ïoh ïa ka hukum na ka hima ne na ka raid.
“La khang tyngeh ban leit bam khana, ban shet jingshet, bad ban bam shabar ha kano-kano ka jaka ha shilynter ka surok Mawkdok-Sohra,” u la ong.
Ka hima ka la bthah ruh ba ym shah ban leh kumjuh ha kiwei pat ki jaka bad jaka shabar jong ka surok Mawkdok-Sohra khlem ka jingbit na ka Dorbar Shnong ba marjan. La bthah ruh ba kiba wan kai ki dei ban don ki pla jaboh ba dei ban pyndonkam ban thep ïa ki jaboh ba ki la dep ban pyndonkam.
U la ong, “Baroh ki kali kiba wan rung sha Sohra- la ka long ki trai shnong ne na shabar ka jylla ruh ki dei ban rah la ka jong ka pla jakhlia ban bret. La khang pyrshah ban bret ïa ki jaboh ha kino-kino ki jaka ne harud surok ruh kumjuh.”
U Bah Alan West u la pyntip ruh ba la shah ban leit sher dara (camping) miet tang ha ki jaka ba la buh kyrpang bad la khang pyrshah ban leit sher dara khlem da ïoh jingbit shabar jong kine ki jaka lymda la pynïaid da ki kynhun ne society kiba tbit.
Shuh-shuh, u la pynpaw ruh ba ka jingleit ïaid kjat (trekking) hapoh ki jaka ba hap hapoh ka jingpeit jong ka Hima Sohra mynta ka donkam ban thung ïa u nongïalam na ka thaiñ ne u Guide bad kane ka treikam ha baroh ki bynta jong ki lynti ïaid kjat.
Ïa kine ki sienjam la pyntreikam ban ïada ïa ka ïoh ka kot jong ka thaiñ bad ïa ka jaka die kaba kyrpang jong ka thaiñ, ka mariang jong ka ban pynthikna ïa ka jingroi kaba neh jong ka kam jngohkai pyrthei ha katei ka thaiñ.
Nalor kane, u la pynbna ruh ba ki vloggers, ki nongleh social media, bad ki media channel ki donkam ban ïoh shwa ïa ki jingmynjur na ka komiti ban kyntiew ne pynmih ïa kino-kino ki jaka bathymmai ne ki bym pat bna paidbah kiba don hapoh u pud u sam ka Hima Sohra.
