Nongstoiñ, Naitung 25
Ka Federation of Khasi Jaiñtia & Garo People, Mawshynrut Circle ha ryngkat ka Aradonga Area Unit ha ka Sngi Thohdieng ki la leit ban jurip ïa ka tnad ‘Infiltration Check Post’ kaba don ha Athiabari West Khasi Hills ha kaba ïadei bad ka jingrung jingmih jong ki bar jylla hapoh ka Jylla lyngba katei ka jaka.
U Bah Evening Marthong, General Secretary ka FKJGP ha ka jingdonlang ki nongkitkam ka Aradonga Area Unit, u la ong ba ha kane ka jingleit ban jurip ïa katei ka tnad, na ka liang ka seng ka la ïoh ruh ban ïakynduh ïa u In-charge katei ka tnad ban ïakren ha kaba ïadei bad katei ka bynta.
“Haba ngi ïoh ban kren bad kane ka tnad, ki la ong ba 24 kynta ki la peit ïa kawei-pa-kawei bad iwei-pa-iwei i nongleit nongwan hapoh ka Jylla la ki dei ki ‘tourist’, ki nongtrei bylla bad kiwei-kiwei ki la leh ïa kata,” ong u Bah Evening.
U Bah Evening u la ong ruh ba na ka liang ka seng kam dei ba kan shu hun bad shu peit kai ïa ka jingwan rung bad ka jingmih jong ki bar Jylla namar ym tip kaei ka jingthmu ka jong ki ha lyndet namar la ïohi ïa ka jingshimkhia jong ka Sorkar ka Jylla Assam ban khynra naphang ïa ki suba mynder (Eviction drive against the illegal immigrants) ha kylleng ki jaka ban pynher krad ïa ki sha ka jaka ba ki wan. Kumta ka long ba ka don ka jingtieng kum ki nongshong shnong jong ka Jylla Meghalaya ïoh lehse ki briew kiba shah beh na Assam kin kylla long ki nongwan rung lane buhai shnong bad rieh tngen ha ka Jylla.
“Dei namar katta, ka seng ka leit ban ïakynduh ïa u In-charge bad na ka liang jong u ruh, u la kular ban nang shimkhia nangne shakhmat bad na ka liang ka seng kan ïai peitngor ïa ka jingrung ka jingmih namar lada shu peit kai khlem leh eiei ka long lehse kine ki bar Jylla kin wan sha ka Jylla tang ban rieh tngen ban lait na ka jingshah beh jong ka Sorkar Assam,” u la ong.
U Bah Evening u la ong ruh ba nangne shakhmat ka seng kan nang ïai trei bad kan nang ïai budien na ka por sha ka por ban ym ailad ïa kine ki bar Jylla kiba thmu ban wan buhai shnong bad rieh tngen hapoh ka Meghalaya hi baroh kawei.
