Shillong, Naitung 25
U MP ka Voice of the People Party (VPP) na Shillong Parliamentary konstitwensi, Dr. Ricky A.J. Syngkon ha ka Sngi Thohdieng u la ïakynduh ïa u Myntri ka tnad kam pohïing ka Sorkar Pdeng, u Amit Shah ban kyrpad ïa ka jingtuklar jong u halor katto-katne ki mat ba kongsan ba kynthup ïa ka jingdawa ba la slem ban pyntreikam noh mardor ïa ka Inner Line Permit (ILP) hapoh ka Jylla bad ka jingpynrung ïa ka Ktien Khasi ha ka Khyrnit ba 8 jong ka Riti Synshar ka ri.
Ha ka jingthoh ba la aiti sha u Shah, u Dr. Syngkon u la kyrpad ban ai noh ïa ka Inner Line Permit (ILP) sha ka Jylla da kaba kdew ïa ki jingsngewkhia halor ka jingnang kiew ka jingwan rung kyrthep jong kiba nabar bad ka jingeh ha ka liang ka jingbun briew halor ki jaidbynriew trai-ri trai-muluk jong ka Jylla.
U la kdew ba ka rukom treikam jong ka ILP, kaba la treikam lypa ha ki Jylla ba marjan kum ka Arunachal Pradesh, Mizoram, Manipur bad Nagaland, la shim ba ka dei ka lad jingïada kaba donkam katkum ka aiñ ban khanglad ïa ka jingwan rung jong kiba nabar bad ban pynneh-pynsah ïa ka jinglong ‘riewlum ba kyrpang jong ka Jylla.
“Namarkata, nga kyrpad jur ïa ka jingkyrshan jong phi ban rah ïa kane ka kam hapoh ka tnad treikam jong phi bad ban sdang ïa ka rukom ïamir jingmut kaba buh ryntih bad baroh ki nongshim bynta, ban bishar bniah ïa ka jingdawa ILP ha ka Jylla ha ka rukom kaba hok, kaba sngewthuh bad kaba buh por. Ka jingai ïa ka ILP kan pynurlong ïa ka jingangnud ba sahteng jong ki paidbah bad kan pynskhem biang ïa ka jingshaniah jong ki ha ki jingïada ka Riti Synshar ba la ai sha ki jaidbynriew trai-ri trai-muluk,” la bynrap u Syngkon.
U MP u la kyrpad ruh ïa ka jingkyrshan jong u Myntri ban pynrung ïa ka ktien Khasi ha ka Khyrnit kaba 8 jong ka Riti Synshar ka Ri, da kaba pynpaw ïa ka jingkordor jong ka kum ka dak ka riti-dustur ba riewspah jong ka Jylla.
“Ka ktien Khasi, kaba la kren da kiba bun ki nongshong shnong trai-ri trai-muluk jong ka Meghalaya, ka long ka dak kaba kongsan jong ka riewspah ka kolshor bad histori jong ka Jylla. Watla ka long kaba la pyndonkam bha, ka riti-dustur thoh kot, ka jingithuh ba pura ha ka kyrdan jong ka Jylla, bad ka jingpynurlong jong baroh ki kyndon ba donkam haba nujor bad katto-katne kiwei pat ki jait ktien kiba la shah kynthup lypa ha ka Khyrnit ba 8, ka Khasi haduh mynta kam pat ïoh ïa ka jingithuh da ka Riti Synshar ka Ri hapoh ka Khyrnit ba 8 jong ka Riti Synshar ka ri India,” u la ong.
“Nga kyrpad jur ïa ka jingkyrshan jong phi ban pynsngew ïa kane ka jingdawa kaba la slem bah bad ka tnad jong phi ban ïarap haba ïadei bad ka jingithuh da ka Riti Synshar ïa ka Khasi-ka jingangnud kaba la slem jong ki paidbah ka Jylla. Ka lah ban long kaba donkam ban kdew ba ïa ka ‘Resolution’ halor kane ka mat la mynjur da ka Ïingdorbar thawaiñ ka Jylla (Meghalaya) ha ka snem 2018 bad ïa kane kajuh la phah pat sha ka Ïingdorbar Parliament ka India na bynta ban wanrah jingkylla,” la thoh u Dr. Syngkon.
Na ka liang u Dr. Syngkon u la kyrpad ruh ïa ki lad kiba kham bha na bynta ka ïoh kam ïoh jam ki samla trai-ri ha ki tnad ‘Para-Military’ kiba don hapoh ka Jylla, khamtam ha ki kam ha ka thup ‘Group C’ bad ki kam ‘Support Staff’.
Kumjuh, u la pan ïa ka jingkyrshan na bynta ka jingai kyrdan ‘Institute of National Importance’ (INI) sha ka North Eastern Indira Gandhi Regional Institute of Health and Medical Sciences (NEIGRIHMS), Shillong, ban kyntiew ïa ki kam pule bad ka jingshakri jong kane ka jaka.
Haba pynskhem ïa ka jingdonkam jong ka jingpynïasoh liengsuiñ, u Dr. Syngkon u la kyrpad ban wanrah biang bad pynkhlaiñ ïa ka jingpynïasoh liengsuiñ na Kad Liengsuiñ Shillong (Umroi) sha ki jaka ba kongsan ha ka Thaiñ Shatei Lam Mihngi.
Shuh shuh u MP u la kyrpad ïa ka jingkyntiew kyrdan ïa ka Indian Institute of Tourism and Travel Management (IITTM), Shillong Centre, sha ka shlem pule kaba pura bad ba laitluid.
Nalor kane, u Dr. Syngkon u la ban jur ba kine ki mat ki don ka jingmut kaba jylliew na bynta ka jingmanbha ka imlang-sahlang, ka ïoh ka kot bad ka kolshor jong ki paidbah ka Jylla, bad u shaniah skhem ba hapoh ka jingïalam jong u Myntri ka tnad Kam Pohïing kan ïarap pynjan ïa kine ki jingangnud ban poi sha ka jingseisoh.
