Shillong, Naitung 25
Ha ka sienjam ban tei ïa ka rukom mariang kaba kham khuid bad kaba kham stad ha ka thaiñ shatei lam mihngi jong ka ri India, ka A Plus Charge ka la pynbna ïa ka jingïatreilang kaba thmu bad ka Ather Energy, ka kompeni kaba pawnam ha ka Ri.
Ka jingïatreilang ka thmu ban pynïar ïa ka rukom charge ïa ki kali elektrik ne ki Electric Vehicle (EV) ha kylleng ka thaiñ shatei lammihngi jong ka Ri India, kaba pynlong bad pynïar ïa ka jingpyndonkam ïa ki kali elektrik ha kane ka thaiñ.
Hapoh kane ka jingïatreilang, ka Ather Energy kan buh ïa ki jaka pyndap ne ki EV Charger ha ki jaka ba kongsan ha kylleng ka thaiñ shatei lammihngi, kawei pa kawei ka jaka kan don ki jaka pyndap ba stet kiba tbit bha, ka jingpynïasoh ïa ki jinglah ban charge ba thymmai jong ka Ather bad ki jinglah ba heh jong ka A Plus. Ki jaka charge kin pyndonkam da ka A Plus Charge, kaba pynthikna ïa ka por treikam kaba khlem jingeh bad ka jingsngewthuh jong ki nongpyndonkam.
Kane ka jingïatreilang ka thmu ban pynkhlaiñ ïa ki lad charge EV ha ka thaiñ shatei lammihngi.
Ki jaka charge thymmai kin pyndap ïa baroh ki kali LEV kiba ïadei bad ka LECCS (Light Electric Combined Charging System) kiba dei ki LEV (Light Electric Vehicles). Yn buh ïa ki ha kylleng ki nongbah, ki lynti ïaid ba kongsan, bad ki jaka ba bun ki briew ban leit ban kyrshan ïa ka jingbun ki nongpyndonkam EV kiba nang kiew stet.
“Ngi pynpaw ka jingsngewkmen ban ïatreilang bad ka Ather Energy, ka kompeni kaba ïasam ïa ka jingthmu jong ngi shaphang ka jingpynneh pynsah, bad ka jingïaid lynti kaba stad. Kane ka jingïatreilang kan ym pynsted tang ïa ka jingpdiang ïa ki EV ha ka thaiñ shatei lammihngi, hynrei kan pynskhem ruh ïa ka kyrdan jong ka A Plus Charge kum ka nongpynïaid ïa ka jaka pyndap bording ba pura jong ka thaiñ,” ong u Samyaku Jain, u Nongseng bad uba dei u Director jong ka A Plus Charge.
Ka bynta ba nyngkong kan thew ïa ki jaka sor ba kongsan kum ka Guwahati, Dibrugarh, Shillong, bad Siliguri. Da ka jingpynheh shuh shuh kaba la thmu na ka bynta ka Jorhat, Dimapur, Agartala, bad kiwei kiwei ki nongbah kiba heh jong ka thaiñ shatei lammihngi ha ki bnai ban wan.
Ki jingpynrung la buh ban sdang shen, kiba ban sdang na ki nongbah ba la kdew haneng. Kane ka jingïatreilang ka pyni ïa ka mawjam kaba kongsan ha ka jingpynroi ïa ka mariang kaba skhem, kaba kynthup lang, bad kaba la pynkhreh na ka bynta ka lawei ha kawei na ki thaiñ jong ka India kaba thymmai tam hynrei kaba dang duna ka jingpynrung.
