Shillong, Naitung 25
U Symbud Myntri Rangbah ka Jylla ba khmih ïa ka tnat Pohïing (Police) Bah Prestone Tynsong u la pynthikna ba ka Sorkar kan leh da kaba tyngeh ïa kiba wan buhai shnong beaiñ hapoh ka jylla Meghalaya.
Haba ïakren bad ki lad pathai khubor ha ka Sngi Thohdieng ka 25 tarik u Naitung 2025, u Bah Prestone u la pyntip ba ka Sorkar Jylla ka la khot ïa ka jingïalang ban ïa pyrkhat halor kane ka kam khamtam hadien ba ka Sorkar Assam ka la sdang ban kyndang ïa ki briew kiba la shah kynnoh ba ki wan sah beaiñ hapoh katei ka jylla.
U Bah Prestone u la ïathuh ruh ba ka Sorkar ka la bthah ïa ka Director General of Police (DGP), ïa baroh ki bor district bad ki Superintendent of Police (SP) jong baroh ki district ba kin peitngor bha bad ban buddien ïa kino-kino ki jingwan rung ki briew shapoh ka jylla.
“Haduh mynta ka Sorkar Jylla kam pat ïoh kano-kano ka kaiphod kaba lap ba don jingwan buhai shnong beaiñ ki briew kiba la shah beh na kiwei ki jylla lane na kiwei ki ri ba marjan shapoh Meghalaya,” la ong u Bah Prestone.
Ha kaba ïadei pat bad ka jingïakren pynbeit pud hapdeng ka Meghalaya bad ka Assam, u Bah Prestone u la ong, “Ka Sorkar Meghalaya mynta ka dang ap ïa ka jubab na ka Sorkar Assam ha kaba ïadei bad ka jingpynbeit tarik ban sdang biang ïa ka jingïakren pynbeit pud.”
Shuh-shuh, u la pynkynmaw biang ruh ba ka Meghalaya ka la dep phah ïa ka jingkyrpad na ka bynta ka tarik ban ïakynduh lang baroh ki Regional Committee jong ar tylli ki jylla.
