Mawkyrwat, Naitung 25
Ki pulit ka South West Khasi Hills District ki la kem noh ïa uwei u bar jylla ba la tip kyrteng kum u Sattar Ali (45 snem) na Khudnamari Dhubri District, Assam halor ka jingkynnoh ba u la leh be-ijot ïa la ka jong ka khunruit kaba dang 13 snem ka rta ha kawei ka shnong ha South West Khasi Hills District.
Katkum ka ejahar ba la ujor da ka kmie jong katei ka khynnah, la ong ba ha 23 tarik u Naitung, 2025 ka kmie jong kane ka khynnah ka la ïoh jingtip na kawei ka para marjan ba ka khun jong ka, ka la shah leh be-ijot ha utei u panah bad ha ka jingtohkit ïa kane khynnah ka la ïathuh ba utei u panah u la leh be-ijot ïa ka kumba 4 haduh 5 sien naduh u bnai Kyllalyngkot jong u snem 2025.
Ïa u Sataar Ali ki pulit ki la ïoh ban kem ha ka 24 tarik u Naitung 2025, bad ha ka jingtohkit u la ïathuh ba u la leh ïa katei ka kam runar. Ki pulit ki la pynngat mukotduma pyrshah ïa u Sattar Ali hapoh ki kyndon aiñ jong ka POCSO Act bad la rah noh sha ïingbishar bad la pynngat Judicial Custody ïa u 14 sngi.
