Shillong, Naitung 25
Ka jingleh khlemakor jong katto-katne ki paidbah ban bret ïa ki jaboh jabaiñ ha ki lynti syngkieñ ka dei ka jingleh kaba pyrkhat tang ïalade shimet bad ban pynjaboh pat ïa ka mariang.
Ha kawei ka jinglap da u Bah Nicholas Kharnami ha ka 25 tarik Naitung, 2025, la lap ïa ka jingwan bret ki briew da ki phew tylli ki tyndong thep drok bathylli ïa kiba la ju pyndonkam ban thep ïa u drok ha kyndong jong ka khyrdop kaba don sha lyndet jong ka JN Stadium kaba don mar syndah bad ka shnong Pynthorbah.
U Bah Kharnami u la lap ïa kane ka jingwan bret pathar ki briew ïa kine ki tyndong ha ka por kumba 3 baje nohphaisngi lyngba ka surok ha Pynthorbah.
Na ka liang u Bah Kharnami katba u dang ïaid lyngba katei ka surok, u la ïohi ïa katei ka song bad ynda u la krad ïa ki song harud surok, la lap pynban ba ki don da ki phew tylli ki tyndong plastik kiba ju pyndonkam ban thep ïa u drok da ki nongdie drok.
Nalor kine ki tyndong plastik, u Bah Kharnami u la lap ruh ba ki don katto-katne tylli ki synduk thep sabon kiba ju pyndonkam ban thep ïa u drok bad ki jaboh jabaiñ ba la thep lang ha ka pla plastik.
Katkum ka dur khih ba la ring dur da u Bah Kharnami ïa kaba u la thep ban pyni paidbah ha ka Facebook jong u, la sakhi ba kine ki tyndong ki dei kiba dang thymmai bad ki bym pat pyndonkam satia.
Na ka liang u Bah Kharnami u la pyntip sha ki bor pynïaid jong ka Dorbar Shnong Pynthorumkhrah halor kane ka jinglap jong u hynrei kham hadien katto-katne por la pyntip ba kine ki tyndong plastik ki la jah noh na katei ka jaka bad suba ba lehse, ki briew ki la shim noh tang ïa ki tyndong bad iehnoh ïa ki jaboh jabaiñ harud surok.
