Shillong, Naitung 25
U MDC ka BJP na Tura, Bernard N. Marak u la aiti ïa ka dorkhas sha u Myntri Rangbah ka Jylla, u Conrad K. Sangma ban kyrpad ïa ka jingtuklar jong u haba ïadei bad ki kam kyndang kiba dang ïaid shakhmat na ka liang ka Sorkar Assam bad ban pyntikna ba ki ‘riewlum ha ki jaka khappud ki ïoh ïa ka jingïada na ki nongwan kyntur be-aiñ.
Katkum ka jingong jong u Marak, kane ka jingkyndang ka ktah ïa kiba bun ki ‘riewlum kiba shong ba sah ha ki distrik khappud jong ka Jylla, kynthup ïa ka Ri-Bhoi, North Garo Hills, bad West Garo Hills, kaba wanrah ïa ka jingsheptieng bad jingbymshngaiñ ha kylleng ki jaka.
“(Nga kyntu ïa phi ban) ban shimkhia haba ïadei bad kane ka jingkyndang bad ban pyntikna ba ki jaidbynriew ‘riewlum ha ki jaka khappud kin ïoh ïa ka jingïada na ki nongwan kyntur be-aiñ,” u la ong ha ka shithi ha ka Sngi Thohdieng.
U Marak u la kyrpad ruh na bynta ka jingpynrem jur halor ki jingkren kiba buh jingma ïa ka jinglong ‘riewlum jong ka Jylla, da kaba kdew kyrpang ïa ka jingkular u Chancellor ka USTM ban ïarap ïa ki briew kiba la kylla long sakma/phet wir namar jong ki jingshah kyndang.
“Kaba sngew shyrkhei ka long ba ki ‘riew saiñ pyrthei, kynthup ïa u MP na Ri-lum Garo, u Saleng Sangma, lah ban ïohi ba u kyrshan ïa ki nongshong shnong be-aiñ ha ki rynsan jingïalang paidbah. Ki jingkren jong ki, ki la saphriang kylleng-kylleng hapdeng ki bym dei ‘riewlum ha ki jaka thor ka Ri-lum Garo, kaba la nang pynjur shuh-shuh ïa ki jingïakynad hapdeng ki jaidbynriew,” u la ong.
U Marak u la dawa ban bishar bniah ïa ki ‘Patta’ ba la ai ha ki jaka thor hadien ka jingïaphiah, da kaba pynphai biang ïa ki hok ba la ai sha ki Nokma kum ka Bor Synshar ïa ka khyndew.
“Ïa ki jaka ba hap hapoh ka Khyrnit ba 6 ha ki jaka thor la bujli noh da ki ‘Plain Mauza’, bad ïa ki nongwan buhai shnong be-aiñ la ai ïa ki kot ki sla ai wai jaka (Pattas) kiba mynta ki donbor ïa ki kot ki sla jong ki jaka ha ki Autonomous District Council (ADC). Wat ka jaka ba la ai da ki Nokma ruh la pynkylla sha kum kine ki ‘Patta’ (lease patta) – ka jingbym hok kaba phi hi kumba ka paw, phi la mad,” la bynrap biang u MDC.
Shuh-shuh, u Marak u la kyrpad ban pynlong da ki jingtohkit ïa ki nongmihkhmat ba la jied kiba ïarap ïa ki jingpynrung be-aiñ.
Na ka liang u Marak u la kyntu ïa u Myntri Rangbah ka Jylla ban pynsangeh ïa ki jingthung kam ki bym dei katkum ka Riti Synshar ïa ki bym dei ‘riewlum ha ki shlem treikam tynrai bad ki bor shnong ha ki Autonomous District Council (ADC).
U MDC u la kynnoh ruh ba wat ki MDC kiba ha ka District Council ki ïarap ïa ki kam khaïi-pateng kiba heh jong ki bym dei ‘riewlum khlem ka jingpynshisha bad ka jingai bor ba biang jong ka TNT da kaba ong, “Kane ka jia ha ka por ba ki nongtrei ka GHADC kim shym la ïoh tulop la palat 43 bnai, kaba nang pynjur shuh-shuh ïa ka jingbym shaniah jong ki paidbah.”
“Ka Executive Committee kaba mynta ka la thung ruh ïa ki bym dei ‘riewlum kum ki dkhot Village Court bad Council ha ki jaka thor – kaba pynkheiñ jur ïa ka jingthmu jong ka Khyrnit ba 6. Kum kine ki pyntlot ïa ka jinglong ‘riewlum ba kyrpang bad pynkheiñ ïa ki jingïada jong ka Riti Synshar bad ki hok riti-dustur ba la pynskhem katkum ka Khyrnit ba 6 jong ka Riti Synshar ka ri India,” u la ong.
