Shillong, Naitung 25
Ka Hynñiewtrep Youths’ Council (HYC) hapoh ka jingïalam u President Bah Roykupar Synrem ki la leit ban ïakynduh ïa ka Myntri ba khmih ïa ka tnat Koit ka Khiah ka Dr. M Ampareen Lyngdoh ban dawa ba dei ban pyndap ïa ki kam ba lait jong ki Medical & Health Officer, ki Specialist, ki Paramedical Staff, ki Nurse & ki Ministerial Staff ha ki CHC, PHC bad ki Sub-centre bapher-bapher ha kylleng ka Ri Khasi-Jaiñtia.
Haba ïakren bad ki lad pathai khubor ha ka Sngi Thohdieng ka 25 tarik u Naitung 2025, u Bah Roykupar Synrem u la ong, “Katkum ka jubab RTI ba la ïoh na ka ophis jong ka Directorate of Health Services, ka la pyntip ba ki 10 tylli ki kam ba lait jong ki medical officers, ki specialist bad kiwei-kiwei ki staff kiba dang hap ban pyndap ha ki CHC, PHC bad Sub-centre bapher-bapher ha kylleng ka ri Khasi-Jaiñtia kynthup ha Ri Bhoi.”
Katkum ki jubab RTI ba la ïoh na ka ophis jong ka Directorate of Health Services (DHS), Meghalaya, Shillong, la pyntip sha ka seng ba naduh u snem 2015-2016 haduh u snem 2019-2020, ki don kumba 359 ngut samla pule ki la shah bei tyngka ha ka Sorkar Jylla ban pule ïa ki Course MBBS ha kylleng ki jaka pule bapher-bapher ha ka Ri, la ong u Bah Roykupar.
La pynlong ïa kine ki samla pule ban ïasoi ïa ka Bond-cum-Agreement bad ka Sorkar kaba ong, ba iwei-pa- iwei samla pule kiba pyndep ïa ka Course kin hap ban shakri ha kano-kano ka bynta jong ki jaka nongkyndong jong ka jylla haduh 5 snem tam. Hynrei la pyntip ba ha kane kajuh ka por kumba 96 ngut ki samla pule kiba la pyndep ïa ka Course hapoh ka State Quota kim shym la pyntip sha ka Sorkar na ka bynta ban pyndep ïa ki kyndon jong ka Bond-cum-Agreement.
U la ong ba ka long ka jingshisha ba ka Sorkar Jylla ka la pynlut da ki klur tyngka na ka pisa paidbah na ka bynta kine ki jingpule jong ki samla pule bad kumta dei ban ïoh biang ïa kajuh na ki ryngkat bad ka sut.
U la bynrap da kaba ong ba la pyntip ïa ngi ba wat la pynmih ïa ki byrta na ka Ophis jong u Director ka Koit ka Khiah ha ka 8 tarik u Risaw 2024 bad ka 02 tarik u Ïaïong 2025, hynrei kine ki samla pule kiba la pyndep ïa ki Course kim shym la pyntip sha ka Sorkar ynda pyndep ïa ka jingpule jong ki.
Kumta ka seng ka la kyntu ïa ka Myntri ba kan sngewbha ban shim ïa ki sienjam kiba tyngeh pyrshah ïa kine ki samla pule kiba bakla bad kumjuh ïa ki samla pule kiba dang pule mynta, da kaba phah ïa ki ban siew ïa ka bai pule baroh kawei ryngkat bad ka sut sha ka Sorkar Jylla, namar ka jingbym pyndep ïa ki kyndon ba la ïakut ha ka Bond-cum-Agreement.
Ka seng ka la kyntu ruh ïa ka Myntri ban pynkiew ïa ka pisa Bond sha ka T.10,000,000 kaba treikam naduh ka Academic Session 2026-2027 na ka bynta ban leh ïa ka course MBBS hapoh ka bhah jong ka Sorkar Jylla ryngkat bad ki kam shakri nongkyndong ba dei ban leh san snem.
Shuh-shuh, ka seng ka dawa ruh ban pynlong ïa ki Dialysis Unit/Centre ha ki Hospital Sorkar bad ki CHC ha kylleng ki jaka jong ka Ri Khasi-Jaiñtia. Da ka jingkiew jong ki nongpang ha kylleng ka Ri Khasi-Jaiñtia kiba don ïa ka jingpang ba la sniew khyllai ne End Stage Renal Disease (ESRD) ki donkam ïa ka jingsumar da ka Dialysis.
