Shillong, Naitung 25
U Symbud Myntri Rangbah ba khmih ïa ka tnat Pohïing, Bah Prestone Tynsong, ha ka Sngi Thohdieng u la pyntip ba ka jingpynrung kam na ka bynta ki kam bapher-bapher ha ka tnat pulit ka la kut mynta ha kaba la dep pynlong ruh ïa ki eksamin bad ngi dang pynkhreh ban lum ïa ki risol ban pynbna paidbah noh.
U la pyntip ruh ba ka jingthep kam pulit hapoh ka jylla ka la jan poi artad sha kaba kut.
Ha ka jingïakren bad ki lad pathai khubor, u Bah Prestone u la pynpaw ba watla um don ïa ka jingkheiñ kaba thikna kiba la wan ïaleh ïa kane ka eksamin hynrei la antad ba ka jingkheiñ kam duna ïa ka 36 haduh 37 hajar ngut ki nongthep.
“Ki jingdonkam baroh la pyndep bad mynta ka tnat ka dang lum ïa ka risol ha shuwa ban pynbna paidbah ïa ka risol jong baroh kiba thep kam pulit,” la ong u Bah Prestone.
Haba ïa dei pat bad ka jingkynnoh ba la don ka jingleh tuh ha ka por thoh eksamin pulit, u Bah Prestone u la ong, “Ka Sorkar ka la bthah ïa ka Director General of Police (DGP) ban tohkit bniah ïa kane ka kam. Hynrei hadien ba la bishar bniah ïa ki kaiphod na baroh ki jaka leh eksamin ha kylleng ka jylla, ka tnat kam shym la lap satia ïa kino-kino ki kam bym hok.”
Kum ban shu kdew hangne, na ka liang u Nongïalam ka Liang Pyrshah Dr. Mukul Sangma ha ki bnai ba la dep u la dawa na ka sorkar ban pynlong biang ïa ka eksamin thung kam pulit da kaba kynnoh ba ka don ka jingleh bym hok.
Haba ïa dei bad kane, u Symbud Myntri ka Jylla ba khmih ïa ka tnat Pohïing (Police), Bah Prestone Tynsong, u la kyntait war da ka ba ong, “Kam mih ka jingkylli ban pynlong biang ïa ka eksamin thung kam pulit.”
