Mairang, Naitung 25
Ka ophis treikam jong u Superintendent of Police, Eastern West Khasi Hills District ha ka 25 tarik u Naitung, 2025 ka la pynlong ïa ka ‘Awareness Program’ ha ki ar tylli ki bynta, kata halor ka jingthombor ïa ki kynthei bad ki aiñ jingïarap ka jingbah khlieh ha ka imlang-sahlang bad kumjuh halor ka jingai jinghikai halor ka jingma u drok ha ryngkat ka jinghikai pyrshah ïa ki jingdih pynbuaid.
Ïa katei ka prokram la pynlong ha Tirot Sing Memorial Hall Pyndengumïong, Mairang ha kaba u MLA ka Mairang Konstitwensi, Bah Metbah Lyngdoh u la wan ban ïadonbynta lang ha kane ka program kum u Kongsan ha ryngkat u MDC ka Mairang, u Bah Equator Nongrang, u Superintendent of Police ka distrik, u Bah Dangsan Khyriem, u ASP, u Bah P. Suchiang, u DSP, ki nongïalam shnong bad kiwei na ki tnad treikam Sorkar ha ryngkat ki paidbah na kane ka thaiñ.
U Bah Metbah Lyngdoh haba kren kum u kongsan u la pynpaw ïa ka jingsngewkmen halor ka jingshimkhia ka ophis u SP ban pynlong ïa kum katei ka prokram ha kaba ka pyrthei baroh kawei ka ïakren bha ïa kine ar tylli ki sobjek.
Shuh-shuh, u la kyntu ïa ka tnad pulit jong ka distrik ba kin dang ïai bteng ban pynlong ïa kum kitei ki prokram sha ki thaiñ nongkyndong khamtam eh halor ki jingjia kiba shyrkhei kiba la jia kaba ki paidbah ki la sakhi hi da la ki jong ki khmat.
Ha katei ka sngi la ïoh ruh ïa ka jingkren pynshai halor ki aiñ jingïada jong ka jingshah thombor ki kynthei bad ka jingma jong u drok kum ki lad ban pyrshah ïa u drok na u Additional SP, Bah P. Suchiang nangta na ka tnad Social Welfare, WKH lyngba ka Kong P.L. Mawlong.
