Guwahati, Naitung:
Ha ka jingïalang kaba la dep ban pynlong ha Krishi Bhawan ha New Delhi ha kine ki khyndiat sngi ba la leit, u Myntri ka sorkar pdeng uba dei khmih ïa ka tnat Agriculture, Farmers’ Welfare, and Rural Development, u Shivraj Singh Chouhan, u la don bynta ban ïamir jingmut bad u Atul Bora, u Myntri ka tnat Agriculture, Horticulture, Animal Husbandry, and Veterinary Services jong ka Assam.
U Myntri ka sorkar pdeng u la pynpaw ïa ka jingsngewkhia kaba jur halor ka jingeh jong ki nongrep ha Assam, kiba mynta ki ïaleh pyrshah ïa baroh ar ki jingshlei um kiba pynjot bad ka jingkyrduh kaba jur ha kylleng ki district bapher bapher.
U Chouhan u la pynthikna ïa ka kynhun na Assam ba ka sorkar pdeng ka ïeng skhem bad ki nongrep ha kane ka jingeh bad ka long kaba la kloi ban ai ka jingkyrshan kaba donkam baroh.
U Chouhan u la pynbna ïa ka jingthmu jong u ban leit jngoh hi dalade ïa ki jaka ba shah ktah ha ka jingshlei um jong ka Assam shen, ban sngewthuh kham bha ïa ka jinglong jingman ha ka jaka bad ban ïakynduh bad ki nongrep kiba shah ktah.”Ngi shimkhia pura ban pynthikna ba ki jingïarap kin poi sha uwei pa uwei u nongrep uba shah ktah ha Assam. Ka sorkar kan ym ailad ïa ki ban ïakynduh ïa kine ki jingeh marwei,” u la ong.
Kum shi bynta ban kyntiew ïa ka jingkyrmen ha ka rep ka riang ha ka jylla, u Myntri ka sorkar pdeng u la bthah ïa ka Indian Council of Agricultural Research (ICAR) ban pyntip ïa ki jait jingthung kiba thymmai bad kiba biang kum u Rajma, u Masoor, u Arhar, u syntiew sngi, jingbam riewhadem, rynsun bad piat, kiba ïadei bad ka jinglong jingman jong ka Assam.
Nalor kata, u la mynjur ban pyllait ïa ki kyndon Digital Farmer Registry kiba donkam hapoh ka Pradhan Mantri Fasal Bima Yojana (PMFBY) ban pynlong ïa ki jingmyntoi na ka Insurance kiba kham suk ban ïoh.
Da kaba pynskhem ïa ka jingangnud jong ka sorkar ban pynneh pynsah ïa ka rep ka riang, u Chouhan u la pynjlan ruh ïa ka Mission Organic Value Chain Development for North Eastern Region (MOVCD-NER) ha Assam sa shisnem, kaba ailad kham bun ka por ïa ki nongrep ban ïoh jingmyntoi na ki kam rep.
Ki heh ophisar jong ka tnad, kynthup ïa u Secretary ka tnad Agriculture jong ka sorkar pdeng u Devesh Chaturvedi, ryngkat bad ki ophisar na ka tnad ka rep ka riang jong ka Assam, ki la ïashim bynta ha kane ka jingïalang kaba la long ha ka lah sngi U Blei.
Lyngba kine ki jingïalang ba khah-khah, u Shivraj Singh Chouhan u la pynpaw biang ïa ka jingaiti jong ka sorkar Ppeng ban ïada ïa ka hok bad ka jingim jong ki nong-rep.
La ka long ki jingjia ba sngewsih jong ka mariang ne ki kam thok, ka sorkar pdeng ka la pynthikna ba ka long kaba kloi ban tuklar bad ban ïada ïa ki nongrep ha man la ka sienjam.
