Imphal, Naitung:
Ka Ïingkashari ba kyrpang hapoh ka aiñ Narcotic Drugs and Psychotropic Substances (NDPS) Act ha Manipur ka la rai pynrem ïa uwei u nongkhaïi drok ba la 43 snem ka rta da kaba set phatok shi snem bad daiñ kuna ruh T.1 lak tyngka.
Ka nongbishar ka Monalisa Maibam ka la ai ïa ka rai ha ka sngi Palei, ha kaba ka la pynshitom ïa u Lunkhongam Haokip uba shong ba sah ha ka shnong Langkhong ha Kangpokpi distrik uba la shah rai pynrem katkum ka kyndon 21(c) jong ka NDPS Act, 1985.
La pyni ïa u hakhmat ka kashari lyngba ka jingïakren ha ka durkhih na Manipur Central Jail, Sajiwa, ha kaba u la shah set phatok.
U Haokip u dei u khun jong u Janglet Haokip u la shah rai pynrem ha ka 17 tarik, Naitung ha kaba ïadei bad ka mukotduma 2022 ba la ujor ha thanad Narcotic Affairs and Border (NAB) Police Station. La kem ïa u ha ka 15 tarik, Risaw, 2022, hadien ba la kem ïa u ryngkat bad u Brown Sugar uba khia 2.040 kg kaba la buhrieh ha ka synduk tiar jong ka kali ar shaka jong u hajan Pukhao Terapur, hajan ka dam Dolaithabi ha Imphal East.
Ka kashari ka la hukum ba ïa ka kuna kaba T.1 lak dei ban siew hapoh hynriew bnai. Lada ym lah ban leh kumta kan pynlong ïa ka jingshah set phatok kaba shah pynjlan shuh shuh sa shisnem.
Hynrei ka ïingbishar ka la ai jingpyllait ruh da kaba weng noh ïa ki 1,012 sngi ba u Haokip u la dep pynlut ha phatok pyrshah ïa ka jingpynshitom jong u. Nalor kata, ka ïingbishar ka la bthah ïa ki bor pynïaid phatok ban pynthikna ba u Haokip un ïoh ïa ka jingsumar kaba biang katba u dang don ha phatok.
